امریکا کے چینی درآمدات پر 10 فیصد ٹیرف عائد کرنے کے اعلان کے بعد چین کی جانب سے بھی رد عمل سامنے آگیا ہے۔
بین الاقوامی خبر رساں ادارے کی رپورٹ کے مطابق امریکی ٹیرف کے جواب میں چین نے امریکا سے ایل این جی اور کوئلے کی درآمدات پر 15 فیصد ٹیرف لگانے کا اعلان کر دیا ہے۔ اس کے علاوہ امریکا سے خام تیل کی درآمدات پر 10 فیصد ٹیرف عائد کرنے کا اعلان بھی کیا ہے۔
چینی وزارت کامرس کا کہنا ہے کہ امریکا سے درآمد زرعی مشینوں اور پک اپ ٹرک پر بھی 10 فیصد ٹیرف لگایا جائے گا، امریکی ٹیرف کے اقدامات ورلڈ ٹریڈ آرگنائزیشن کے قوانین کی سنگین خلاف ورزی کے زمرے میں آتے ہیں۔
واضح رہے کہ امریکی صدر ڈونلڈ ٹرمپ نے 2 روز قبل بڑے تجارتی شراکت داروں چین، کینیڈا اور میکسیکو پر نئے ٹیرف لگادیئے تھے۔
دوسری جانب امریکا کی پڑوسیوں سے تجارتی جنگ کا خطرہ ٹل گیا، صدر ٹرمپ نے میکسیکو اور کینیڈا پراضافی ٹیرف 30 دن کیلئے روک دیا۔
ٹرمپ کا کینیڈین وزیراعظم جسٹن ٹروڈو اور میکسین صدر کلاڈیا سے ٹیلی فونک رابطہ ہوا ہے، میکسیکو اور کینیڈا نے غیر قانونی تارکین وطن اور منشیات روکنے کیلئے اقدامات کی یقین دہانی کرادی ہے۔
امریکا کی پڑوسیوں سے تجارتی جنگ کاخطرہ ٹل گیا
میکسیکو نے امریکی سرحد پر نیشنل گارڈز کے 10 ہزار اہلکار تعینات کرنے کا اعلان کردیا ہے، واضح رہے کہ ٹرمپ نے گزشتہ ہفتے اضافی ٹیرف لگا دیا تھا، جس پر پڑوسیوں نے جوابی ٹیرف عائد کر دیا تھا۔
