چین نے شہریوں کو اپنی پرانی گاڑیوں کو ترک کرنے اور نئی گاڑیاں خریدنے کے لیے مالی امداد (سبسڈی) میں اضافہ کیا ہے۔
تفصیلات کے مطابق چین نے اپنے شہریوں کو پرانی گاڑیاں ترک کرنے اور نئی گاڑیاں خریدنے کی ترغیب دینے کے لیے مالی امداد میں اضافہ کیا ہے۔
چین کی سرکاری خبر رساں ایجنسی نے اپنی رپورٹ میں کہا ہے کہ چینی حکام نے قومی آٹو موبائل تجدید پروگرام کو اپ گریڈ کرنے کا اعلان کیا ہے۔
وزارت تجارت اور چھ دیگر سرکاری محکموں کی جانب سے جاری سرکلر کے مطابق نئی توانائی سے چلنے والی گاڑیوں کی خریداری کے لیے سبسڈی کو اپریل کے مقابلے میں 10ہزار یوآن(1ہزار399ڈالر) سے دوگنا کرتے ہوئے 20ہزار یوآن کردیا گیا ہے۔
ایندھن سے چلنے والی مسافر گاڑیوں کی خریداری کے لیے سبسڈی 7 ہزار یوآن سے بڑھا کر 15ہزار یوآن کر دی گئی ہے۔
نئی پالیسی کا اطلاق رواں سال 24 اپریل سے 10 جنوری 2025 کے درمیان جمع کرائی جانے والی سبسڈی کی درخواستوں پر ہوگا۔
انڈسٹری کے اعداد و شمار کے مطابق چین میں رواں سال جنوری سے جولائی تک تقریبا 50 لاکھ نئی انرجی مسافر گاڑیاں اور ایندھن سے چلنے والی65لاکھ 70ہزارگاڑیاں انفرادی صارفین کو فروخت کی گئیں جو بالترتیب گزشتہ سال کے مقابلے میں 33.7 فیصد اضافہ اور 15 فیصد کم ہیں۔
چائنا ایسوسی ایشن آف آٹوموبائل مینوفیکچررز کے اعداد و شمار کے مطابق ’این ای ویز‘ کی فروخت جولائی میں 991,000 یونٹس تک پہنچ گئی جو کہ سالانہ 27 فیصد زیادہ ہے جبکہ این ای وی کی پیداوار جولائی میں 984,000 یونٹس رہی، جو کہ سال بہ سال 22.3 فیصد زیادہ ہے۔
