لاہور : چین نے پاکستان کو اسموگ پر قابو پانے کے لئے مدد کی پیشکش کرتے ہوئے کہا اسموگ کے فوری سدباب کےلئے تکنیکی و فنی اعانت کیلئے تیار ہیں۔
تفصیلات کے مطابق نگران صوبائی وزیر ماحولیات بلال افضل کی چینی قونصل جنرل زہو شائرن سے ملاقات ہوئی ، ملاقات میں اسموگ تدارک کیلئے چینی ماہرین کی خدمات سے استفادے کے امور پر تبادلہ خیال کیا گیا۔
نگران وزیر نے کہا کہ اسموگ پر قابو پانے کےلئے چین کی حکومت کا تعاون درکار ہے، ائیرکوالٹی انڈکس 400 کی خطرناک شرح پرجائے توشارٹ ٹرم حل مصنوعی بارش ہے۔
جس پر قونصل جنرل زہو شائرن کا کہنا تھا کہ پنجاب میں اسموگ کے فوری سدباب کےلئے تکنیکی و فنی اعانت کیلئے تیار ہیں، چین کے ماہرین ماحولیات کے وفود جلد پنجاب کا دورہ کریں گے۔
چینی قونصل جنرل نے لاہور میں ایئر پیوریفکیشن ٹاور بنانے کی تجویز پیش کی اور کہا ایئرپیوریفکیشن ٹاورفضائی آلودگی پر قابو پانے میں معاون ثابت ہو گا۔
