بیجنگ: چین کے وزیر خارجہ وانگ یی نے ایران پر اسرائیل کے ’وحشیانہ حملوں‘ کی مذمت کی ہے۔
غیر ملکی میڈیا رپورٹس کے مطابق چینی وزیر خارجہ وانگ یی نے ایران اور اسرائیل میں اپنے ہم منصبوں سے فون پر بات چیت کی ہے۔
اسرائیلی وزیر خارجہ جدعون ساعر کے ساتھ فون پر ہونے والی گفتگو میں وانگ نے کہا کہ چین اسرائیل کی جانب سے ایران پر طاقت سے حملہ کر کے بین الاقوامی قوانین کی خلاف ورزی کی واضح طور پر مخالفت کرتا ہے، ایک ایسے وقت میں جب عالمی برادری اب بھی ایرانی جوہری مسئلے کے سیاسی حل کی تلاش میں ہے۔
انھوں نے سفارت کاری کی طرف واپسی پر زور دیتے ہوئے کہا کہ ایرانی جوہری مسئلے کے حل کے لیے سفارتی راستے ابھی ختم نہیں ہوئے، طاقت دیرپا امن نہیں لا سکتی۔
ایران اسرائیل جنگ سے متعلق تازہ ترین خبریں یہاں پڑھیں
ایرانی وزیر خارجہ عباس عراقچی سے فون گفتگو میں وانگ نے کہا کہ چین اسرائیل کی جانب سے ایران کی خودمختاری، سلامتی اور علاقائی سالمیت کی خلاف ورزی کی مذمت کرتا ہے اور ایرانی حکام کو نشانہ بنانے والے ’وحشیانہ حملوں‘ کی مخالفت کرتا ہے۔
انھوں نے کہا کہ ایران اپنی خود مختاری کا تحفظ کر رہا ہے اور چین اس کی حمایت کرتا ہے، ایران کی جوہری تنصیبات پر حملے کر کے اسرائیل نے ایک خطرناک مثال قائم کی جس کے تباہ کن نتائج ہو سکتے ہیں۔
