بیجنگ: چینی وزیر دفاع ویئی فنگے نے کہا کہ امریکا کے ساتھ جنگ دنیا بھرکے لیے تباہی کا باعث بن سکتی ہے۔
تفصیلات کے مطابق چین کے وزیر دفاع نے امریکا کو تائیوان کے معاملے میں مداخلت پروارننگ دیتے ہوئے کہا کہ تائیوان ہمارے لیے مقدس سرزمین کی حیثیت رکھتا ہے۔
ویئی فنگے نے سنگاپور میں منعقدہ علاقائی سیکیورٹی کانفرس سے خطاب کرتے ہوئے کہا کہ امریکی بحریہ تائیوان اور جنوبی چین کے سمندر کے پانیوں میں مداخلت سے باز رہے۔
انہوں نے کہا کہ امریکا جنگ چاہتا ہے توچین اس کے لیے تیار ہے، امریکا بات چیت کا راستہ اختیار کرتا ہے تو ہمارے دروازے کھلے ہیں۔
چینی وزیردفاع نے کہا کہ اگر کسی نے بھی چین کے تائیوان کے ساتھ معاملے میں مداخلت کی تو چین آخری حد تک جنگ لڑے گا۔
انہوں نے کہا کہ چین کو تقسیم کرنے کی کوئی سازش کامیاب نہیں ہوگی، تائیوان کے معاملے میں کسی بھی قسم کی مداخلت کا انجام بہت برا ہوگا۔
چینی وزیردفاع نے کہا کہ اگرامریکا ناقابل تقسیم ہے تو چین بھی ناقابل تقسیم ہے، چین کو ہرحال میں متحد ہونا چاہیے اور یہ متحد ہوگا۔
دوسری جانب امریکی صدر ڈونلڈ ٹرمپ تائیوان کی خودمختاری کی بات دوہرا رہے ہیں اور اس کے علاوہ تائیوان اور چین کے درمیان سمندر میں امریکی بحریہ کے جہازوں کوبھی بھیجا ہے۔
