کراچی : دنیا کی سب سے بڑی بس ساز کمپنی یوٹونگ نے کراچی میں انٹرا سٹی اور ای وی بسز کا پلانٹ لگانے کا فیصلہ کرلیا۔
تفصیلات کے مطابق سندھ کے سینئر وزیر شرجیل انعام میمن نے پاکستان کے عوام کو بڑی خوشخبری سنادی۔
دنیا کی سب سے بڑی بس ساز کمپنی یوٹونگ مشرق وسطیٰ کے سی ای او اور دیگر حکام کی کراچی میں سندھ کے سینئر وزیر شرجیل انعام میمن سے ملاقات ہوئی۔
جس میں سینئر وزیر شرجیل انعام میمن کی جانب سے جولائی 2022 میں دی گئی دعوت پر یوٹونگ کی جانب سے کراچی میں پلانٹ لگانے کا فیصلہ کیا گیا۔
شرجیل انعام میمن نے کہا کہ چینی کمپنی کی جانب سے کراچی میں پلانٹ لگانے کا کام تین ماہ کے اندر شروع ہو جائے گا اور پلانٹ کا کام اگلے سال مکمل ہو جائے گا۔
صوبائی وزیر کا کہنا تھا کہ چینی کمپنی کی انٹرا سٹی اور الیکٹرک بسز اب کراچی میں بنیں گی،پلانٹ میں ای وی بسز اور ہائبرڈ ڈیزل بسز تیار کی جائیں گی، شرجیل انعام میمن
انھوں نے مزید کہا کہ پلانٹ لگنے سے صنعتوں کو فروغ ملے گا، روزگار کے نئے مواقع پیدا ہوں گے اور کراچی میں بسز کی تیاری سے پاکستان کا زرمبادلہ بھی بچے گا ساتھ ہی بسوں کی ایکسپورٹ سے پاکستان کو بھی فائدہ ہوگا۔
