اسلام آباد : وزیراعظم عمران خان سے ملاقات میں ہوچی سن پورٹ ہولڈنگ کمپنی نے پاکستان میں 240 ملین ڈالر سرمایہ کاری کا اعلان کردیا ، نئی سرمایہ کاری سے 3ہزار ملازمتیں پیدا ہوں گی۔
تفصیلات کے مطابق وزیراعظم عمران خان سے ہانگ کانگ پورٹ آپریٹنگ کمپنی کے وفد کی ملاقات ہوئی ، ملاقات میں وزیربحری امور علی زیدی، مشیر تجارت رزاق دؤاد ، معاون خصوصی زلفی بخاری، سفیر برائےبیرونی سرمایہ کاری علی جہانگیر صدیقی شریک تھے۔
ملاقات میں ہوچی سن پورٹ ہولڈنگ کمپنی نے پاکستان میں 240 ملین ڈالر سرمایہ کاری کا اعلان کیا ، جس پر وزیراعظم نے کمپنی کی سرمایہ کاری، ملکی معاشی خوشحالی کےعزم کا خیر مقدم کیا۔
وزیراعظم نےسرمایہ کاری،کاروبارمیں آسانیوں کے لئے اقدامات سے آگاہ کرتے ہوئے کہا معاشی نمو اور روزگار کی فراہمی کیلئے سرمایہ کاروں کو مدد فراہم کریں گے۔
ملاقات کے اعلامیے میں کہا گیا کہ ہچی سن پورٹ ہولڈنگ کراچی پورٹ پرٹرمینل کی استعدادمیں اضافہ کرے گی ، ہانگ کانگ کمپنی پاکستان میں سرمایہ کاری کو 1ارب ڈالرتک لے جائے گی، نئی سرمایہ کاری سے3ہزار ملازمتیں پیدا ہوں گی۔
مزید پڑھیں : مصر اور لبنان کے کاروباری کنسورشیم کا پاکستان میں ڈیڑھ ارب ڈالر کی سرمایہ کاری کا اعلان
ہچی سن پورٹ ہولڈنگ کے وفد نے پاکستان کی اقتصادی ترقی میں سہولت کاری کیلئے عزم کا اظہار کرتے ہوئے کہا کمپنی کراچی پورٹ کو ایشیا کی تجارت کا مرکز بنانے میں سہولت فراہم کرے گی۔
یاد رہے رواں ماہ کے آغاز میں مصر کی کمپنی ال سویدی الیکٹرک کا شعبہ توانائی میں 50 کروڑ ڈالر کی سرمایہ کاری کا عندیہ دیا تھا ، جس پر وزیراعظم عمران خان نے کہا تھا بھرپور کوشش ہے کہ شعبہ قابل تجدید توانائی کو فروغ دیا جائے۔
اس سے قبل مصر اور لبنان کے اعلی سطحی کاروباری کنسورشیم نے پاکستان میں ڈیڑھ ارب ڈالر کی سرمایہ کاری کا اعلان کیا تھا، سرمایہ کاری صحت، ٹیکنالوجی اور ہاوسنگ کے شعبوں میں کی جائے گی۔
