The news is by your side.

چینی قونصلیٹ حملہ، ماسٹر مائنڈ ’اچھو‘ بھارت میں ہے، وزیر داخلہ بلوچستان کی تصدیق

کوئٹہ: وزیر داخلہ بلوچستان سلیم کھوسہ نے کہا ہے کہ چینی قونصلیٹ پر حملے کا ماسٹر مائنڈ اسلم اچھو بھارت میں ہے، اس کی ہلاکت کی خبریں غلط تھیں۔

تفصیلات کے مطابق وزیرداخلہ بلوچستان سلیم کھوسہ نے چینی قونصلیٹ پر حملے کے ماسٹر مائنڈ اسلم اچھو کی بھارت میں موجودگی کی تصدیق کرتے ہوئے کہا کہ بلوچستان کے حالات خراب کرنے میں بھارت ملوث ہے۔

وزیر داخلہ بلوچستان نے کہا کہ تینوں دہشت گردوں سے متعلق ہم بھی تحقیقات کررہے ہیں، ہلاک حملہ آور کا نام 2015 سے لاپتا افراد کی فہرست میں شامل تھا۔

چینی قونصلیٹ حملے کی تحقیقات میں اہم پیش رفت

دوسری جانب پولیس اور حساس اداروں نے سندھ میں مشترکہ کارروائی کرتے ہوئے 3 مشتبہ افراد کو گرفتار کرلیا ہے، ذرائع کے مطابق دہشت گردوں کی مقامی سہولت کاروں نے مدد کی تھی۔

ذرائع کے مطابق بھارتی خفیہ ایجنسی اور این ڈی ایس نے دہشت گردوں کی مالی مدد کی، حملے میں بھارتی خفیہ ایجنسی اور این ڈی ایس کے ملوث ہونے کے شواہد ملے ہیں۔

ذرائع کے مطابق سہولت کاروں نے دہشت گردوں کو گاڑی خرید کر دی تھی، ممکنہ طور پر گرفتار تینوں مشتبہ افراد سہولت کار ہوسکتے ہیں۔

یہ پڑھیں: چینی قونصلیٹ پر حملے کا ماسٹر مائنڈ اسلم عرف اچھو کا سراغ مل گیا

یاد رہے کہ گزشتہ روز کراچی کے علاقے کلفٹن میں واقع چینی قونصل پر حملے میں 2 پولیس اہلکار شہید اور ایک زخمی ہوگیا تھا جبکہ جوابی کارروائی میں 3 دہشت گرد مارے گئے تھے۔

چینی قونصل خانے پرحملے میں دیگر 2 افراد بھی جاں بحق ہوئے تھے جن کی شناخت نیازمحمد اور محمد ظاہرشاہ کے ناموں سے ہوئی تھی۔

جاں بحق ہونے والے دونوں افراد کا تعلق کوئٹہ سے تھا جو ویزے کے حصول کے لیے قونصل خانے گئے تھے۔

Comments

یہ بھی پڑھیں