اسلام آباد : پاک بحریہ کیلئے چین اور ترکی میں جدید ترین بحری جہازوں کی تعمیر کا آغاز ہوگیا ، دونوں جہازجدید ٹیکنالوجی، مختلف حربی آلات اورسینسرز سے لیس ہوں گے۔
تفصیلات کے مطابق ترجمان پاک بحریہ کی جانب سے بیان میں کہا گیا ہے کہ پاک بحریہ کیلئے چین میں تیار کیے جانے والے تیسرے اے 054فریگیٹ کی تیاری اور ترکی میں دوسرے میلجم کلاس کو رویٹ جہازوں کی تعمیر کا آغاز ہوگیا ہے۔
ترجمان نے کہا چین میں تیسرے جدید ترین بحری جہاز فریگیٹ 054 کی تعمیر کی تقریب ہڈونگ ژونگوا شپ یارڈ میں منعقد ہوئی ، میلجم کلاس کورویٹ جہاز کی تعمیر کی تقریب استنبول نیول شپ یارڈ میں کی گئی۔
تقریب میں چین اور ترکی میں تعینات پاک بحریہ کے چیف نیول اوورسیئرزتقاریب میں شریک ہوئے جبکہ تقاریب میں پاک بحریہ کےافسران، شپ یارڈز کے نمائندوں اور دیگر معززین نےشرکت کی۔
دونوں جہازجدید ٹیکنالوجی، مختلف حربی آلات اورسینسرز سےلیس ہوں گے، بیڑے میں جہازوں کی شمولیت سے ملکی سمندری دفاع مزید مضبوط ہو گا، بحری جہاز خطے میں طاقت کےتوازن کوبرقرار رکھنے میں اہم کردار ادا کریں گے۔
