پشاور: صوبہ خیبر پختونخواہ میں ہونے والی موسلا دھار بارشوں اور سیلاب کے بعد ڈیرہ اسماعیل خان اور چترال کو آفت زدہ قرار دے دیا گیا۔
تفصیلات کے مطابق وزیر اعلیٰ خیبر پختونخواہ محمود خان نے سیلاب سے متاثرہ اضلاع ڈیرہ اسماعیل خان اور چترال کو آفت زدہ قرار دینے کا فیصلہ کیا ہے۔
اس سلسلے میں متعلقہ حکام کو ضروری کارروائی عمل میں لانے کی ہدایت کی ہے۔
وزیر اعلیٰ کا کہنا ہے کہ متاثرہ علاقوں میں ریلیف سرگرمیاں تیز کی جائیں، متعلقہ ضلعی انتظامیہ ہر متاثرہ فرد تک رسائی یقینی بنائیں۔
انہوں نے کہا کہ موسم کی صورتحال بہتر ہوتے ہی ڈیرہ اسماعیل خان اور چترال کا دورہ کروں گا، متاثرہ علاقوں کی بحالی کے خصوصی پیکج کا اعلان کروں گا، متاثرہ خاندانوں کے تمام نقصانات کا ازالہ کیا جائے گا۔
خیال رہے کہ صوبہ خیبر پختونخواہ سمیت ملک بھر میں ہونے والی موسلا دھار بارشوں اور سیلاب کے باعث 15 لاکھ افراد متاثر ہوئے ہیں جبکہ اب تک 700 اموات ہوچکی ہیں۔
