بہاولپور: چولستان میں 7 ہزار سال قدیم شہر گنویری والا میں کھدائی کا آغاز ہو گیا۔
تفصیلات کے مطابق صحرائے چولستان میں سات ہزار سال قدیم سندھ تہذیب کے حامل ہڑپہ سے بڑے شہر گنویری والا کی دریافت کے بعد آخر کار حکومت کی طرف سے فنڈز کی فراہمی کے بعد کھدائی کے کام کا آغاز کر دیا گیا ہے۔
قلعہ دراوڑ سے 60 کلومیٹر کے فاصلے پر گنویری والا کے آثار کا سراغ 1975 میں ڈاکٹر محمد رفیق مغل سابق ڈائریکٹر جنرل پنجاب آرکیالوجی نے لگایا تھا، وسائل کی کمی، سائٹ کے قریب پانی اور افرادی قوت کی عدم دستیابی کی وجہ سے یہاں کھدائی نہیں کی جا سکی تھی۔
اس قدیم شہر کی ابتدائی کھدائی سے مٹی کے برتن اور نوادرات برآمد ہوئے تھے، جن میں مجسمے اور تانبے کی مہریں شامل ہیں، ماہرین کا کہنا ہے کہ گنویری موہنجو داڑو سے چھوٹا اور ہڑپہ سے بڑا شہر ہے۔
حکومت کی طرف سے فنڈز مہیا ہونے کے بعد یہاں باضابطہ طور پر کھدائی کا کام شروع کر دیا گیا ہے، چولستان میں قدیم انڈس تہذیب کے شہر گنویری والا کی دریافت سے سیاحت میں اضافے کے ساتھ ساتھ ملکی زرمبادلہ میں بھی اضافہ ہوگا۔
