راولپنڈی: وفاقی وزیر برائے ہوا بازی غلام سرور خان کا کہنا ہے کہ مسیحی برادری نے ہمیشہ انسانیت کی خدمت کی، دنیا کے تمام مذاہب امن اور صبر کا سبق دیتے ہیں۔
تفصیلات کے مطابق وفاقی وزیر برائے ہوا بازی غلام سرور خان نے ٹیکسلا کرسچن اسپتال میں کرسمس کے موقع پر خطاب کرتے ہوئے کہا کہ کرسمس کے موقع پر تمام مسیحی برادری کو مبارکباد دیتا ہوں، ہم آپ کی خوشیوں میں شامل ہیں۔
غلام سرور خان نے کہا کہ آج کا دن بہت اہمیت کا حامل ہے، بحیثیت پاکستانی بھی ایک بڑا دن ہے، آج قائداعظم کی بھی یوم پیدائش ہے،قائد اعظم نے بھی اقلیتوں کے حقوق پر زور دیا تھا۔
انہوں نے کہا کہ دنیا کے تمام مذاہب امن اور صبر کا سبق دیتے ہیں، حضرت عیسی علیہ السلام نے بھی پیار اور امن کا درس دیا،
مسیحی برادری نے ہمیشہ انسانیت کی خدمت کی۔
وفاقی وزیر غلام سرور خان نے کہا کہ ہماری حکومت کی بھرپور کوشش ہے کہ قائداعظم نے اقلیتوں کے جو حقوق بیان کیے ان پر عمل کیا جائے۔
قائدِ اعظم محمد علی جناحؒ کا 144 واں یومِ ولادت آج منایا جا رہا ہے
واضح رہے کہ آج ملک بھر میں قائدِ اعظم محمد علی جناح کا 144 واں یومِ پیدائش مِلّی جوش و جذبے کے ساتھ منایا جا رہا ہے۔
