کراچی : کے الیکٹرک کی جانب سے زائد بلنگ کے معاملے پر شہری نے سندھ ہائی کورٹ سے رجوع کرلیا اور کہا تین بلوں میں 5 لاکھ 98 ہزار روپے کا بل بھیج دیا گیا ہے۔
تفصیلات کے مطابق سندھ ہائیکورٹ میں شاہ رسول کالونی کلفٹن میں کے الیکٹرک کی جانب سے زائد بلنگ کے معاملے پر شہری سندھ ہائی کورٹ پہنچ گیا اور درخواست دائر کردی۔
درخواست گزار نے بتایا کہ کے الیکٹرک کی جانب سے اچانک تین بلوں میں 5لاکھ 98ہزار کا بل بھیج دیا گیا۔
وکیل درخواست گزار عبدالخالق بگھیو کا کہنا تھا کہ کوئی نوٹس نہیں دیا گیا اور کنڈا کا الزام بھی لگایا اور فیصلہ بھی کردیا، جس پر عدالت نے کہا کہ پہلے آپ کے کتنے یونٹس آتے تھے؟
وکیل درخواست گزار نے بتایا کہ جج صاحبان اس قبل یہ کے الیکٹرک کے اسٹار کسٹمر تھے تو عدالت کا کہنا تھا کہ تو آپ کے الیکٹرک کے آفس جائیں نا، کے الیکٹرک حکام سے رجوع کریں۔
درخواست گزارنے عدالت کو بتایا کہ جج صاحبان ہم کے الیکٹرک جاچکے ہیں لیکن وہاں کوئی بات سننے کو تیار نہیں، بغیر کسی نوٹس کے 2 لاکھ سے زائد کے تین بل بھیج دئیے ہیں۔
عدالت نے کہا کہ اس بل میں کنڈے کا ذکر ہے آپ کنڈا استعمال کرتے ہیں؟ درخواست گزار کا کہنا ہے کہ نہیں ہمارے گھر کے باہر بریکٹ لگا کر گلی کو کنیکشن دئیے ہوئے ہیں تو عدالت نے کہا کہ اچھا آپ نے پورے محلے کو بجلی دی ہوئی ہے۔
جس پر درخواست گزار نے بتایا کہ نہیں جج صاحبان ہم نے کسی کو نہیں دی ، کے الیکٹرک نے ہی اس بریکٹ سے کنکشن دئیے ہوئے ہیں۔
عدالت نے درخواست گزار کو موجودہ بل ادا کرنے کی ہدایات دے دی اور کہا بقایاجات کے لیے اگلی سماعت 12 اکتوبر کو ہوگی۔
