اسلام آباد : پاکستان سیٹیزن پورٹل نے مسیحی برادری کے افراد کی شکایات اور حل سے متعلقہ اعداد وشمار پیش کردیئے۔
اس حوالے سے رپورٹ میں کہا گیا ہے کہ 3سال میں مسیحی برادری کے10ہزار 700 افراد سیٹیزن پورٹل پر رجسٹرڈ ہوئے ان میں 1300سے زائد خواتین بھی شامل ہیں۔
رپورٹ کے مطابق13ہزار430شکایات رپورٹ ہوئیں جن میں سے 95فیصد درخواستیں نمٹائی گئیں، حل شدہ شکایات کے تناظرمیں 6 ہزار664افراد نےاپنی رائے کا اظہار کیا۔
رپورٹ میں بتایا گیا ہے کہ مجموعی طور پر پورٹل کی خدمات پر اظہار اطمینان کا تناسب 50فیصد رہا، سب سے زیادہ دو ہزار366شکایات بجلی و توانائی شعبہ سے متعلق موصول ہوئیں۔
میونسپل سروسز کی شکایات 2031تھیں، مسیحی برادری صحت انصاف کارڈ کی سہولت پر سو فیصد مطمئن ہے جبکہ کسان و زراعت سے 90فیصد اور آڈیٹر جنرل سے79فیصد مطمئن ہیں۔
پاکستان سیٹیزن پورٹل کی رپورٹ کے مطابق اسٹیٹ لائف سے75فیصد، نادرا سے72 فیصد لوگوں نے اطمینان کا اظہار کیا، اقلیتی برادری کے24 ہزار532 افراد سیٹیزن پورٹل پر رجسٹرڈ ہوچکے ہیں۔ اقلیتی برادری کی 95فیصد شکایات نمٹائیں جاچکی ہیں۔
