کراچی : آن لائن ٹیکسی کے انتظار میں کھڑے شہری کو کراچی کی مصروف ترین سڑک شارع فیصل پر چار مسلح ملزمان نے کمانڈو ایکشن کر کے لوٹ لیا۔
تفصیلات کے مطابق اسلام آباد کے رہائشی کو کراچی میں شادی کی تقریب میں شرکت مہنگی پڑگئی، ائیرپورٹ جانے کے لئے آن لائن ٹیکسی کے انتظار میں کھڑے شہری کو جرائم پیشہ عناصر نے لوٹ لیا۔
واردات کی سی سی ٹی وی فوٹیج سامنے آگئی ہے، جس میں دیکھا جاسکتا ہے کہ مسلح جرائم پیشہ عناصر نے کمانڈو ایکشن کیا ، دوڑتے ہوئے آئے اور شہری کا سب کچھ لوٹ کر لے گئے۔
ملزمان شہری سے موبائل فون، نقد رقم، کارڈز، سفری بیگ، کوٹ لے کرفرار ہوگئے، ریحان ارشد اسلام آباد سے شادی کیلئے کراچی آیا تھا۔
ریحان ارشد نے ائیر پورٹ کیلئے آن لائن ٹیکسی بک کرائی تھی،آن لائن ٹیکسی سروس نے لوکیشن پر پہنچنے کا بتایا ،باہر نکل کر دیکھا تو ڈرائیور کی جگہ ڈاکووں موجود تھے۔
