The news is by your side.

Advertisement

شہری عیدالاضحٰی پر آن لائن یا اجتماعی قربانی کو ترجیح دیں، صدر مملکت

اسلام آباد : صدر مملکت عارف علوی کا کہنا ہے کہ شہری عیدالاضحیٰ پر آن لائن یا اجتماعی قربانی کو ترجیح دیں۔

سربراہ مملکت ڈاکٹر عارف علوی نے ان خیالات کا اظہار نیشنل کمانڈ اینڈ آپریشن سینٹر کے 100 دن مکمل ہونے پر اپنے پیغام کیا، صدر مملکت کا کہنا تھا کہ نیشنل کمانڈ اینڈ آپریشن سینٹر نے بہترین انداز میں کام کیا۔

عارف علوی کا کہنا تھا کہ این سی او سی کو 100 دن مکمل ہونے پر مبارکباد پیش کرتا ہوں، نیشنل کمانڈ اینڈ آپریشن سینٹر کے فیصلوں کی وجہ سے وبا کنٹرول ہوئی۔

سربراہ مملکت کا کہنا تھا کہ شہری ماسک کا استعمال کریں اور سماجی فاصلہ یقینی بنائیں، عید کے موقع پر احتیاط سے کرونا کا پھیلاؤ روکا جاسکتا ہے۔

خیال رہے ملک میں کرونا وائرس کے کیسز کا ڈیٹا مرتب کرنے اور دیگر اقدامات کرنے کے سلسلے میں قائم کیے جانے والے قومی کمانڈ آپریشن سینٹر کو سو روز مکمل ہو گئے۔

این سی او سی نے کرونا کا بہادری اور عقل مندی سے مقابلہ کرنے پر قوم، بالخصوص ڈاکٹرز، نرسز اور پیرا میڈیکل اسٹاف کو خراج تحسین پیش کیا، ادارے کی جانب سے کہا گیا کہ ہیلتھ کیئر ورکرز نے وبا کے دوران جرات و بہادری سے فرائض انجام دیے۔

این سی او سی کے سو روز مکمل ہونا اس بات کی بھی علامت ہے کہ ہنگامی امدادی عملہ اور قانون نافذ کرنے والے ادارے صحت مند پاکستان کے سفر میں شریک ہیں۔

واضح رہے کہ پاکستان میں کرونا وائرس انفیکشن سے متاثرہ افراد کی تعداد بڑھ کر 2 لاکھ 25 ہزار 283 ہو گئی ہے اور کیسز کی تعداد کے لحاظ سے 213 ممالک میں پاکستان دنیا کا 12 واں ملک بن چکا ہے جبکہ اموات کی تعداد 4,619 ہو گئی ہے۔

نیشنل کمانڈ اینڈ آپریشن سینٹر کی جانب سے جاری اَپ ڈیٹ کے مطابق گزشتہ چوبیس گھنٹوں کے دوران ملک میں 3,387 نئے کیسز سامنے آئے، جب کہ مزید 68 مریض جاں بحق ہو گئے، نئے اور مہلک وائرس کو وِڈ نائنٹین سے پاکستان بھر میں 225,283 افراد متاثر ہو چکے ہیں، جب کہ اموات کی تعداد 4,619 ہو گئی ہے۔

fb-share-icon0
Tweet 20

Comments

comments

یہ بھی پڑھیں