کراچی : سول ایوی ایشن اتھارٹی کو دو حصوں میں تقسیم کرنے کیلئے کارروائی کا آغاز کردیا گیا ہے، اس حوالے سے ڈائریکٹر ایچ آر نے نوٹیفکیشن بھی جاری کردیا۔
ذرائع کا کہنا ہے کہ ائیرپورٹ سروسز کو بین الاقوامی میعار کے مطابق بہتر بنانے اور ریگولیٹری کی مجموعی استعداد کو بڑھانے کا عزم کرتے ہوئے سی اے اے کو تقسیم کیا جارہا ہے۔
فیصلے کے مطابق سی اے اے کی ریگولیٹری اور آپریشنل کے معاملات کو الگ الگ کیا جائے گا، وفاقی حکومت سول ایوی ایشن اتھارٹی کو دو حصوں میں تقسیم کرنے کی منظوری پہلے ہی دے چکی ہے، سی اے اے ملازمین کو دوسر ے محکمے میں تبادلے کی پیشکش کی گئی ہے۔
ڈائریکٹر ہیومن ریسورس ملک مظہر حسین نے نوٹیفکیشن جاری کردیا ہے جس کے مطابق سول ایوی ایشن اتھارٹی نے ملازمین کو اپنی مرضی سے کسی بھی شعبہ میں خدمات دینے کی پیشکش کی گئی ہے۔
ملازمین اپنے تجربہ اور صلاحیت کی بنیاد پر تبادلہ کی درخواست جمع کروا سکتے ہیں، سی اے اے ملازمین15 جنوری 2021تک اپنے تبادلے کے لئے درخواست دے سکتے ہیں۔
ڈائریکٹر ہیومن ریسورس کے حکم نامے کے مطابق ملازمین کے تبادلے کا حتمی اختیار سول ایوی ایشن اتھارٹی کے پاس ہی ہوگا، ایسے ملازمین خود کسی آپشن کا استعمال نہیں کرتے انہیں ایوی ایشن ڈویژن کے دیگر محکموں میں ازخود ٹرانسفر کردیا جائے گا۔
اس کے علاوہ سی اے اے کے وہ ملازمین جو دیگر محکموں سے آئے ہیں انہیں بھی واپس اپنے محکموں میں جانے کی اجازت ہوگی، سی اے اے کی جانب سے ملازمین کو ٹرانسفر کیلئے رضامندی ظاہر کرنے کیلئے پر فارمہ بھی جاری کردیا گیا ہے۔
ڈائریکٹر ہیومن ریسورس کا نوٹیفکیشن میں کہنا ہے کہ سی اے اے ملازمین آئندہ ماہ15جنوری تک اپنی رضامندی کے فارم جمع کروانے کے پابند ہوں گے۔
