کراچی: وزیر اعلیٰ سندھ کی جانب سے بنائی گئی انکوائری کمیٹی کی رپورٹ میں سول اسپتال میں دواؤں کی مد میں 35 کروڑ روپے سے زائد کی کرپشن کا انکشاف سامنے آگیا۔
انکوائری رپورٹ کے مطابق آئی ٹی ڈپارٹمنٹ، ریکارڈ، کنزیومر اور میڈیکل اسٹور کا ریکارڈ غائب پایا گیا، اونکالوجی ڈپارٹمنٹ کی سربراہ اور اسٹاف نرس نے اپنے دستخط جعلی قرار دیے۔
رپورٹ میں بتایا گیا کہ اے ایم ایس ڈاکٹر نصر اللہ اور ڈاکٹر نے کہا کہ عام روٹین میں شیٹ پر دستخط کیے تھے، سول اسپتال کے اسٹور انچارج نیاز علی خاصخیلی نے بیان ریکارڈ نہیں کروایا۔
اس میں مزید انکشاف ہوا کہ نیاز علی خاصخیلی عدالت سے ضمانت مسترد ہونے پر مفرور ہو چکا ہے، اس کے خلاف اسپتال کی دواؤں میں خورد برد کا کیس ہے۔
21 جون 2024 کو سول اسپتال سے مبینہ طور 36 کروڑ مالیت کی کینسر کی ادویات چوری ہوگئی تھیں۔ محکمہ صحت کے ملازمین کے خلاف تھانہ عیدگاہ میں چوری کا مقدمہ میڈیکل سپرنٹنڈنٹ سول اسپتال کی مدعیت میں درج کیا گیا تھا۔
سول اسپتال سے 10 ماہ میں کینسر کی 76 ہزار گولیاں چوری کی گئی تھیں، سول اسپتال میں تعینات نیاز خاصخیلی اور اقبال چنا چوری میں ملوث قرار دیا گیا تھا۔
کینسر کی چوری ہونے والی میڈیسن کی مالیت 36 کروڑ روپے تھی، دوائیاں 17 فروری 2023 سے 26 ستمبر 2023 کے عرصہ میں غائب کی گئیں۔
سپرنٹنڈنٹ کا کہنا تھا کہ شکایت ملی کہ ادویات مدت سے پہلےختم ہو رہی ہیں جس پر انکوائری کی گئی۔
