کراچی: کراچی سول سوسائٹی کے کارکنان نے شہرکے پوش علاقے میں واقع کھڈا مارکیٹ میں حکومت کی جانب سے سعودی شہزادوں کو نایاب پرندوں کے شکار کے لئے اجازت نامہ جاری کرنے کے خلاف احتجاج کیا۔
عدالتِ عظمیٰ نے رواں سال اگست کے مہینے میں سعودی شہزادوں کے پاکستان میں نایاب نسل کے پرندوں کے شکار پر پابندی عائد کردی تھی تاہم حکومت کی جانب سے ایک بار پھر سعودی شہزادوں کو شکارکے اجازت نامے جاری کرنے پر غور کیا جارہا ہے، جس کے خلاف کراچی کے علاقے کھڈا مارکیٹ میں شکار کے اجازت نامے جاری کرنے کے خلاف سول سوسائٹی کی جانب سے احتجاج کیا گیا ہے۔
سول سوسائٹی کے رکن نعیم صادق کا کہنا ہے کہ عدالتی پابندی کے باجود اب بھی حکومت سعودی شہزادوں کو شکار کے اجازت نامے جاری کررہی ہے۔
سول سوسائٹی کی ایک اور خاتون رہنما کا کہنا تھا کہ جن پرندوں کے شکار کی اجازت دی جاتی ہے وہ بہت نایاب نسل کے پرندے ہیں۔ انہوں نے سوال اُٹھایا کہ غیر ملکیوں کو کیوں پاکستانی سرزمین پر شکار کی اجازت دی جاتی ہے، یہ پرندے مہمانوں کی طرح پاکستان آتے ہیں، کسی کو اختیار نہیں کہ ان پرندوں کو مارے۔
انہوں نے حکومت سے ایک اور سوال کیا کہ غیر ملکی شہزادے کیوں شکار کے لئے پاکستان آتے ہیں اور ان کو اجازت کیوں دی جاتی ہے؟۔
احتجاج میں درجنوں افراد نے شرکت کی جنہوں مختلف قسم کے پلے اٹھائے رکھے تھے جن میں انگریزی اردو اور عربی میں عبارات درج تھیں۔
0
20
