اسلام آباد: چیف جسٹس آف پاکستان جسٹس میاں ثاقب نثار نے اپنے بیان کی وضاحت دیتے ہوئے کہا ہے کہ گزشتہ روز پاناما نہیں ڈان لیکس جے آئی ٹی سے متعلق ریمارکس دیے تھے۔
تفصیلات کے مطابق سپریم کورٹ میں کیس کی سماعت کے دوران میاں ثاقب نثار کا کہنا تھا کہ گزشتہ روز میں نے پاناما لیکس کی جے آئی ٹی سے متعلق کچھ نہیں کہا البتہ کل ڈان لیکس کی تفتیشی ٹیم سے متعلق ریمارکس دیے تھے۔
اُن کا کہنا تھا کہ مجھ سے غلطی ہوگئی ہوگی ازراہ کرم بیان کی تصیح کی جائے، شاید کسی کو مجھ سے زیادہ محبت ہے۔
واضح رہے کہ گزشتہ روز چیف جسٹس سے متعلق ایک بیان زیر گردش تھا کہ جسٹس میاں ثاقب نثار نے سماعت کے دوران پاناما جے آئی ٹی سے متعلق بیان دیا جس میں اُن کا کہنا تھا کہ ’پاناما جے آئی ٹی میں حساس اداروں کے افسران کو عدالت نے نہیں سابق وفاقی وزیر داخلہ چوہدری نثار نے شامل کروایا تھا‘۔
مزید پڑھیں: چوہدری نثار نے پاناما لیکس کے لیے جے آئی ٹی کی تشکیل میں اپنے کردار کی تردید کر دی
بعد ازاں سابق وزیرِ داخلہ چوہدری نثار علی خان نے نواز شریف کے خلاف پاناما لیکس کی تحقیقات کے لیے بنائی جانے والی مشترکہ تحقیقاتی ٹیم کی تشکیل میں اپنے کردار کی تردید کر دی تھی۔
چیف جسٹس ثاقب نثار کے ریمارکس پر چوہدری نثار نے وضاحتی بیان جاری کرتے ہوئے کہا تھا کہ جے آئی ٹی اعلیٰ عدلیہ کے 3 رکنی بینچ کے حکم پر تشکیل دی گئی تھی۔
چوہدری نثار نے تردید کرتے ہوئے کہا تھا ’جے آئی ٹی کی تشکیل اور اُس میں فوجی افسران کی شمولیت میں میرا کوئی عمل دخل نہیں تھا، جے آئی ٹی کی تشکیل میں مجھ سے کوئی مشاورت نہیں کی گئی تھی‘۔
