اسلام آباد : چیف جسٹس ثاقب نثار نے ملک بھر میں چھوٹے ڈیمز کی تفصیلات طلب کرلیں اور کہا کراچی میں پانی سےمتعلق 25 دسمبر کو خوش خبری ملے گی۔
تفصیلات کے مطابق سپریم کورٹ میں چیف جسٹس ثاقب نثار نے ڈھڈوچہ ڈیم کی تعمیر سے متعلق کیس کی سماعت کی، سماعت میں چیف جسٹس ثاقب نثار نے ملک بھر میں چھوٹے ڈیمز کی تفصیلات طلب کرلیں اور اٹارنی جنرل کو ڈیمز کی معلومات ایک ہفتے میں پیش کرنے کا حکم دیا۔
چیف جسٹس نے ریمارکس دیئے کراچی میں پانی سےمتعلق 25دسمبرکوخوش خبری ملےگی، کراچی میں ٹریٹمنٹ پلانٹس پرتیزی سے کام جاری ہے۔
جسٹس میاں ثاقب نثار کا کہنا تھا کہ ڈیم بنانا عدالتوں کاکام نہیں، حالات کی سنگینی کےباعث مداخلت کررہےہیں، ڈیم کی تعمیر کا حکم دینے سے پہلے 3ماہ ماہرین سے رائے لی۔
چیف جسٹس نے بحریہ ٹاؤن اور پنجاب حکومت سے ڈھڈوچہ ڈیم پر17اکتوبر کی پیشرفت رپورٹ طلب کرلی اور کہا بحریہ ٹاؤن اورپنجاب حکومت میٹنگ کرکےنتائج سےآگاہ کریں۔
دوران سماعت جسٹس ثاقب نثار نے ریمارکس دیئے ڈیم سے متعلق ایک شہری نےترانہ بھی بنایاہے، ترانے کو ڈیم اشتہار کا حصہ بنایا جائے۔
بعد ازاں سپریم کورٹ میں ڈیمز سے متعلق سماعت 17اکتوبر تک ملتوی کردی گئی۔
یاد رہے جولائی میں چیف جسٹس نے کراچی میں واٹرٹریٹمنٹ پلانٹ کا افتتاح کیا تھا اور افتتاحی تقریب سے خطاب کرتے ہوئے کہا تھا کہ آنے والی نسلوں کو تحفظ دینے کے لیے پانی کے ذخائر کو بڑھانے کی اشد ضرورت ہے، گلگت کے لوگوں نے بھاشا اور دیا میرڈیم کی تعمیرپربہت خوشی کا اظہار کیا لیکن ساتھ ہی وہ اپنی شناخت کے لیے فکرمند تھے۔
واضح رہے کہ واٹرٹریٹمنٹ پلانٹ کی کل لاگت 36،117 ملین سے زائد ہے جس سے واٹرٹریٹمنٹ پلانٹ یومیہ 77 ملین گیلن گندے پانی کو صاف کرے گا جبکہ ٹریٹمنٹ پلانٹ 180 ملین گیلن گندے پانی کوصاف کرنے کی صلاحیت رکھتا ہے۔
