اسلام آباد : چیف جسٹس قاضی فائز عیسی کے اعزاز میں ظہرانہ کل دیا جائے گا، اس سے قبل انھوں نے الوداعی عشائیہ لینے سے انکار کیا تھا۔
تفصیلات کے مطبق چیف جسٹس قاضی فائز عیسی کے اعزاز میں ظہرانہ کل دیا جائے گا، ظہرانے کا اہتمام نامزد چیف جسٹس اور سپریم کورٹ کی جانب سے کیا گیا۔
ذرائع کا کہنا تھا کہ چیف جسٹس کو الوداعی ظہرانے پر تحائف بھی دیئے جائیں گے۔
چیف جسٹس نے اس سے قبل الوداعی عشائیہ لینے سے انکار کیا تھا، ان کا مؤقف تھا عوام کے پیسے سے 20 لاکھ روپے کا ڈنر نہیں لینا چاہتا۔
ذرائع نے کہا کہ سپریم کورٹ میں زیرتعمیر بنیادی حقوق کی یادگار کا افتتاح بھی کل ہوگا، چیف جسٹس یادگار کا دیگر ججز کے ساتھ افتتاح کریں گے۔
خیال رہے چیف جسٹس پاکستان کے اعزاز میں الوداعی فل کورٹ ریفرنس 25 اکتوبر جمعہ کو ساڑھے 10 بجے سپریم کورٹ میں ہوگا، جس سے نامزد چیف جسٹس یحییٰ آفریدی بھی خطاب کریں گے۔
