سڈنی: سابق آسٹریلوی امپائر سائمن ٹوفل نے فائنل میں اوور تھرو پر 6 رنز دینے کا فیصلہ غلط قرار دے دیا۔
تفصیلات کے مطابق سابق آسٹریلوی امپائر سائمن ٹوفل نے ورلڈ کپ فائنل میں اوور تھرو پر 6 رنز دینے کے فیصلے کو غلط قرار دیتے ہوئے کہا کہ امپائر کے فیصلے نے میچ پر اثر ڈالا۔
سائمن ٹوفل نے کہا کہ امپائر کمار دھرماسینا کو پانچ رنز دینے چاہئے تھے، گپٹل نے جب تھرو کی دونوں بلے باز کراس نہیں ہوئے تھے، قانون کے مطابق اوور تھرو پر پانچ رنز بنتے تھے۔
دوسری جانب کیوی کپتان کین ولیم سن نے اوو تھرو پر 6 رنز دینے کے معاملے پر کہا کہ ورلڈ کپ کے بڑے میچز میں ایسا نہیں ہونا چاہئے۔
واضح رہے کہ گزشتہ روز میچ میں امپائر کمار دھرماسینا نے اوور تھرو پر 6 رنز دئیے تھے جس کے بعد انگلینڈ نے میچ برابر کردیا تھا۔
یاد رہے کہ گزشتہ روز انگلینڈ نے ورلڈ کپ کے فائنل میچ میں نیوزی لینڈ کو شکست دے کر پہلی بار ورلڈ چیمپئن بننے کا اعزاز حاصل کیا تھا، سپر اوور میں بھی میچ برابر ہونے پر انگلینڈ کو زیادہ باؤنڈریز پر فاتح قرار دیا گیا تھا۔
ورلڈ کپ فائنل کے مین آف دی میچ انگلینڈ کے بین اسٹوکس قرار پائے تھے، نیوزی لینڈ کے کپتان کین ولیم سن کو ٹورنامنٹ کا بہترین کھلاڑی قرار دیا گیا تھا۔
ورلڈ کپ فائنل میں زیادہ باؤنڈریز پر انگلش ٹیم کو چیمپئن قرار دئیے جانے کے فیصلے پر آئی سی سی کو سوشل میڈیا پر سخت تنقید کا سامنا ہے، ٹویٹر پر آئی سی سی رولز کا ہیش ٹیگ ٹاپ ٹرینڈ بن گیا۔
