نیویارک: اقوام متحدہ کے سیکریٹری جنرل نے خبردار کیا ہے کہ آب و ہوا میں تبدیلیوں کے ٹائم بم نے ٹک ٹک کرنا شروع کر دیا ہے۔

تفصیلات کے مطابق اقوام متحدہ کے سکریٹری جنرل انتونیو گوتریس نے اقوام عالم سے عالمی درجہ حرارت میں اضافے کے خلاف تمام شعبوں میں اقدامات اٹھانے کی اپیل کر دی ہے۔

بین الحکومتی پینل برائے تبدیلی آب و ہوا (IPCC) کی طرف سے تبدیلی آب و ہوا کے بارے میں تازہ ترین رپورٹ کے اجرا کے بعد سیکریٹری جنرل نے پیر کے روز جاری ویڈیو پیغام میں کہا کہ ’’آب و ہوا کے ٹائم بم نے ٹک ٹک کرنا شروع کر دیا ہے۔‘‘

انھوں نے کہا کہ گزشتہ پچاس برسوں میں درجہ حرارت میں اضافے کی شرح بہت زیادہ ہو گئی ہے، یہ گزشتہ 2 ہزار سالوں کے مقابلے میں کافی زیادہ ہے۔ انھوں نے کہا ’’کم سے کم 20 لاکھ سالوں میں کاربن ڈائی آکسائیڈ کا ارتکاز بلند ترین سطح پر پہنچ چکا ہے۔‘‘

دنیا بھر میں پانی کا بحران، اقوام متحدہ نے خبردار کردیا

گوتریس نے کہا کہ اس رپورٹ کا مطلب ہے کہ آب و ہوا میں تبدیلی کو روکنے کے لیے انتہائی اقدامات کی ضرورت ہے، یہ رپورٹ تقاضا کرتی ہے کہ ہر ملک کے ہر شعبے سے اس تبدیلی کو روکنے کے لیے کوششیں ہوں۔