پشاور : پشاور ہائی کورٹ نے ایکس کی بندش پروزارت داخلہ کونوٹس جاری کرتے ہوئے جواب طلب کرلیا۔

تفصیلات کے مطابق پشاور ہائی کورٹ میں ایکس کی بندش کیخلاف دائر درخواست پر سماعت ہوئی، جسٹس نعیم انور اور جسٹس فضل سبحان پر مشتمل دو رکنی بینچ نے سماعت کی۔

وکیل درخواست گزار نے بتایا کہ پاکستان میں کئی ماہ سےایکس کو بند کیا گیا ہے، ایکس بندش کی وجہ سے لوگوں کو مشکلات کا سامنا ہے، وزیراعظم، وزرا خود ایکس استعمال کرتے لیکن عوام کیلئے اس پر پابندی ہے۔

پشاور ہائیکورٹ نے وزارت داخلہ کو نوٹس جاری کرتے ہوئے جواب طلب کرلیا۔

یاد رہے دو روز قبل لاہور ہائیکورٹ نے ایکس پر پابندی کیخلاف درخواست پر اٹارنی جنرل پاکستان کو 17 اپریل کیلئے طلب کیا ہے۔

چیف جسٹس لاہور ہائیکورٹ نے باور کرایا تھا کہ فل بنچ یہ چاہتا ہے اٹارنی جنرل پاکستان عدالت میں موجود ہوں اور وہ عدالت میں آکر ٹویٹر پر پابندی کی قانونی حیثیت کا بتائیں۔