ریاض: سعودی عرب نے مصنوعی بارش کے لیے مزید 5 طیارے خریدنے کا معاہدہ کیا ہے، سعودی عرب یہ ٹیکنالوجی حاصل کرنے والا دوسرا ملک ہے۔
اردو نیوز کے مطابق سعودی عرب نے کلاؤڈ سیڈنگ (مصنوعی بارش) کے لیے مزید 5 طیاروں کا سودا کیا ہے، مملکت کی جانب سے وزیر ماحولیات و پانی و زراعت انجینیئر عبد الرحمٰن الفضلی نے معاہدے پر دستخط کیے۔
وزیر ماحولیات کا کہنا ہے کہ 4 طیارے مصنوعی بارش اور ایک موسمیاتی مطالعات کے کام آئے گا، پانچوں طیارے اپنی نوعیت کے جدید ترین ہیں اور ہر طرح کی مطلوبہ ٹیکنالوجی سے آراستہ ہیں۔
انہوں نے توجہ دلائی کہ کلاؤڈ سیڈنگ طیاروں کے سودے کا مقصد سعودی عرب میں مصنوعی بارش ٹیکنالوجی تیار کرنا ہے، اس سے مصنوعی بارش کا عمل مؤثر ہوگا اور اس کا دائرہ کار وسیع ہوگا۔ طیاروں کی آپریشنل لاگت کم ہوگی۔
سیکریٹری ماحولیات ڈاکٹر اسامہ فقیہ کا کہنا ہے کہ مصنوعی بارش پر ریسرچ کرنے والے طیارے سعودی عرب کے علاوہ ایک اور ملک کے پاس ہیں، ہمارا ملک اس حوالے سے دوسرا ہے۔
انہوں نے کہا کہ ہمارا مقصد نباتات کی افزائش اور آبی وسائل کا فروغ ہے، ہم پانی کے تجدد پذیر ذرائع سے ہر ممکن استفادے کی پالیسی پر گامزن ہیں۔
