نئی دہلی: عام آدمی پارٹی کے رہنما وزیر اعلیٰ اروند کیجریوال کے ریمانڈ میں 15 اپریل تک توسیع کر دی گئی۔
دہلی کے وزیر اعلیٰ اور اہم اپوزیشن رہنما اروند کیجریوال کو انفورسمنٹ ڈائریکٹوریٹ کی تحویل ختم ہونے پر عدالت میں پیش کیا گیا، مقامی عدالت نے کیجریوال کو پندرہ اپریل تک جوڈیشل ریمانڈ پر تہاڑ جیل بھیج دیا۔
انفورسمنٹ ڈائریکٹوریٹ نے کیجریوال کو شراب پالیسی کیس میں منی لانڈرنگ کے الزام میں 21 مارچ کو گرفتار کیا تھا۔
پیر کو مقامی عدالت نے فیصلہ دیا کہ اروند کیجریوال کو مزید دو ہفتوں کے لیے حراست میں رہنا چاہیے، اور انھیں دہلی کے بدنام زمانہ تہاڑ جیل بھیج دیا۔ یہ تیسری توسیع ہے جو عدالتوں نے کیجریوال کو جیل کی سلاخوں کے پیچھے رکھنے کے لیے مرکزی حکومت کی ایجنسی انفورسمنٹ ڈائریکٹوریٹ (ای ڈی) کو دی ہے۔
واضح رہے کہ ہندوستان کی اپوزیشن جماعتوں نے اس ماہ کے آخر میں ملک کے انتخابات سے قبل مودی حکومت پر ’’میچ فکسنگ‘‘ کا الزام لگایا ہے۔ کیجریوال کو دو ہفتے قبل ڈرامائی طور پر ان کے گھر سے گرفتار کیا گیا تھا، یہ پہلی بار تھا جب کسی موجودہ وزیر اعلیٰ کو حراست میں لیا گیا۔
