لاہور: وزیر اعلیٰ پنجاب سردار عثمان بزدار نے پنجاب کے بڑے شہروں میں ماحول دوست بسیں اور صوبائی دارالحکومت لاہور میں مزید فیڈر بسیں چلانے کا حکم دے دیا۔
تفصیلات کے مطابق وزیر اعلیٰ پنجاب سردار عثمان بزدار کی زیر صدارت محکمہ ٹرانسپورٹ کا اجلاس ہوا، اجلاس میں وزیر اعلیٰ کو ایکو فرینڈلی اربن بس پراجیکٹ پر بریفنگ دی گئی۔
عثمان بزدار نے بڑے شہروں میں ماحول دوست بسیں چلانے کی ہدایت کی جبکہ صوبائی دارالحکومت لاہور میں مزید فیڈر بسیں چلانے کا حکم دیا۔
اجلاس میں لاہور میں پہلے مرحلے میں 100 فیڈر بسیں چلانے کے فیصلے کی اصولی منظوری دے دی گئی۔
وزیر اعلیٰ کا کہنا تھا کہ پبلک ٹرانسپورٹ کو جدید خطوط پر استوار کرنا اہم ضرورت ہے، ماحولیاتی آلودگی میں کمی کے لیے بس پراجیکٹ لا رہے ہیں، ایکو فرینڈلی اربن بسیں چلنے سے اسموگ پر قابو پانے میں مدد ملے گی۔
انہوں نے کہا کہ شہروں میں عوام کو بہترین ٹرانسپورٹ فراہم کی جائے گی۔
اجلاس میں ٹھوکر نیاز بیگ پر انٹرنیشنل لیول بس اسٹینڈ منصوبے پر رپورٹ طلب کرلی گئی، وزیر اعلیٰ نے ٹھوکر نیاز بیگ بس ٹرمنل کو جلد از جلد پایہ تکمیل تک پہنچانے کی ہدایت کی۔
انہوں نے کہا کہ ٹرمنل سے شہر میں ٹریفک اور ماحولیاتی آلودگی میں کمی آئے گی۔
