کراچی: پاکستان تحریک انصاف سندھ کے صدر حلیم عادل شیخ کا کہنا ہے کہ سندھ میں 12سال میں کرپشن مراد علی شاہ کی ذمے داری ہے. زرداری، فریال تالپور اور مرادعلی شاہ کرپشن بند کرنے کو تیار نہیں ہیں۔
تفصیلات کے مطابق میڈیا سے گفتگو کرتے ہوئے حلیم عاد شیخ کا کہنا تھا کہ مرادعلی شاہ خود کو شفاف پیش کرنے کی کوشش کرتے ہیں، پاکستان تحریک انصاف اب ان چوروں کے خلاف کھڑی ہوگی۔
انہوں نے کہا کہ سانحہ تیزگام افسوسناک واقعہ ہے، اسی دن میرپور خاص پہنچا، پیپلز پارٹی کے سوشل میڈیا کارکنوں نے جعلی ویڈیو چلائیں، لاشوں پر سیاست کرنے کی کوشش کی گئی۔
رہنما پی ٹی آئی کا کہنا تھا کہ نمازجنازہ کے لیے عمرکوٹ گیا، پتہ چلا تیمور تالپور بڑا مافیا ہے، پولیس نے پتھر مارے اور گاڑی روکنے کی کوشش کی، میری گاڑی پر اندھا دھند فائرنگ بھی کی گئی۔
سندھ کےعوام تبدیلی کی راہ دیکھ رہے ہیں‘ حلیم عادل شیخ
ان کا کہنا تھا کہ ایک گاڑی روک کر ہمارے لوگوں پر تشدد کیا اور گاڑی تباہ کردی، ایس ایس پی عمر کوٹ اعجاز شیخ منشیات فروش ہے۔
حلیم عادل شیخ نے مزید کہا کہ پاکستان تحریک انصاف اب ان چوروں کے خلاف کھڑی ہوگی، مرادعلی شاہ نے حملہ کرایا، بلاول کوپتہ نہ ہو لیکن بلاول ہاؤس کو پتہ ہے۔
