وزیر اعلیٰ خیبر پختونخوا علی امین گنڈاپور نے وفاقی حکومت کی جانب سے اپنی تعریف کرنے کے سوال کا معنی خیز جواب دیا۔
اے اؔر وائی نیوز کے مطابق وزیراعلیٰ خیبر پختونخوا علی امین گنڈاپور نے پنڈی اڈیالہ جیل کے باہر میڈیا سے مختصر گفتگو کرتے ہوئے کہا کہ میرا ایک ہی لیڈر ہے اور وہ عمران خان ہے۔ بانی پی ٹی آئی کو کوئی مائنس نہیں کر سکتا۔ جو کر رہا ہے، وہ بے وقوف ہے۔
اس موقع پر ایک صحافی نے وزیراعلیٰ کے پی سے دلچسپ سوال کیا کہ وفاقی حکومت آپ کی بڑی تعریف کرتی ہے۔
علی امین گنڈاپور نے صحافی کے اس سوال کا دلچسپ اور معنی خیز جواب دیتے ہوئے کہا کہ حکومت اگر تعریف کرتی ہے تو آپ سمجھ جائیں کہ یہ کیا چاہتے ہیں۔ لیکن وہ جو چاہتے ہیں، میں وہ نہیں کر سکتا۔
ان کا یہ بھی کہنا تھا کہ مجھ پر پارٹی کا کوئی دباؤ نہیں ہے اور عدالتی احکامات کے مطابق ہی ہم نے بانی پی ٹی آئی سے ملاقات کے لیے فہرست جیل انتظامیہ کو بھیجی۔
اس سے قبل وزیراعلیٰ علی امین گنڈاپور دیگر افراد کے ہمراہ بانی پی ٹی آئی عمران خان سے ملاقات کے لیے اڈیالہ جیل پہنچے جہاں سینئر پولیس افسر نبیل کھوکھر نے انتظار کرنے کا کہا۔
سینئر پولیس افسر نبیل کھوکھر سے گفتگو میں علی امین گنڈاپور نے کہا کہ ہم ہائیکورٹ کے حکم کے مطابق بنائی گئی لسٹ کے ذریعہ یہاں پہنچے ہیں۔ ہمیں بتا دیں کہ ہمارے لیے کیا حکم ہے، ہم انتظار کر رہے ہیں۔
پولیس افسر نے وزیراعلیٰ کے پی اور دیگر سے کہا کہ آپ بیٹھیں، ہم آپ کو کچھ دیر میں بتاتے ہیں۔
واضح رہے کہ گزشتہ دنوں بانی پی ٹی آئی عمران خان کی ہمشیرہ علیمہ خان نے میڈیا سے گفتگو کرتے ہوئے کہا تھا کہ لگتا ہے کہ پارٹی سے تحریک انصاف سے مائنس بانی پی ٹی آئی ہو گیا ہے۔
