پشاور:وزیراعلیٰ خیبرپختونخواہ محمود خان نے خیبرپختونخوا ٹورازم اتھارٹی قائم کرنے کا فیصلہ کیا ہے، اتھارٹی کے قیام کا مقصد سیاحت کو بطورصنعت متعارف کرانا ہے۔
تفصیلات کے مطابق وزیراعلیٰ خیبرپختونخواہ محمود خان کی زیرصدارت سیاحت کے فروغ سے متعلق اجلاس ہوا، جس میں وزیراعلیٰ محمود خان کی جانب سے خیبرپختونخوا ٹورازم اتھارٹی قائم کرنے کا فیصلہ کیا گیا۔
اجلاس میں پی ٹی ڈی سی کی مد میں وفاق کو10 فیصدلائبلیٹیز کے بغیر رقم دینے پر اتفاق کیا گیا، پی ٹی ڈی سی کے اثاثے آؤٹ سورس کر کے نئے ہوٹلزتعمیر کیے جائیں گے۔
وزیراعلیٰ خیبرپختونخواہ کی زیرصدارت اجلاس میں کاغان ڈیولپمنٹ اتھارٹی کے قیام کے لیے محکمہ خزانہ کو 2 ہفتے میں فنڈز دینے اور سیاحتی مقامات میں سیاحوں کے لیے ہوم سٹیز منصوبہ شروع کرنے کی ہدایت کی گئی، ہوم سٹیز پراجیکٹ 500 ملین کی لاگت سے مکمل ہوگا۔
اجلاس میں کے پی ٹورازم پولیس کے قیام کے لیے 700ملین روپے کی فراہمی پر بھی اتفاق کیا گیا، ٹورازم پولیس میں 500 اہلکار تعینات کیے جائیں گے، صوبے میں سیاحتی مقامات کی تشہیر کے لیے 500 ملین روپے مختص کرنے کی ہدایت بھی کی گئی۔
وزیراعلیٰ خیبرپختونخواہ محمود خان نے کہا کہ سیاحتی مقامات پر موبائل ہیلتھ یونٹس، ریسکیواسٹیشنز قائم کیے جائیں گے۔
