The news is by your side.

Advertisement

وزیراعلیٰ پنجاب کا لاک ڈاؤن سے متاثر ثقافتی،ادبی تنظیموں واداروں کے لیےگرانٹ کا اعلان

لاہور: وزیراعلیٰ پنجاب سردار عثمان بزدار نے لاک ڈاؤن سے متاثر ثقافتی،ادبی تنظیموں واداروں کے لیےگرانٹ کا اعلان کیا ہے۔

تفصیلات کے مطابق وزیراعلیٰ پنجاب سردار عثمان بزدار کا ایک اور احسن اقدام سامنے آیا ہے۔عثمان بزدار نے وبا اور لاک ڈاؤن سے متاثرثقافتی،ادبی تنظیموں واداروں کے لیے فنڈز کے اجرا کی منظوری دیتے ہوئے محکمہ اطلاعات وثقافت کو منظور شدہ فنڈز جلد فراہم کرنے کی ہدایت کی ہے۔

وزیراعلیٰ پنجاب کا کہنا تھا کہ لاک ڈاؤن سے زندگی کا ہر طبقہ متاثر ہوا ہے،متاثرہ طبقات کی ضروریات پوری کرنا حکومت کی ذمہ داری ہے۔انہوں نے کہا کہ پنجاب حکومت اداروں کی خدمات کو قدر کی نگاہ سے دیکھتی ہے۔

سردار عثمان بزدار نے کہا کہ پنجاب حکومت ثقافتی وادبی اداروں کی معاونت جاری رکھےگی،ثقافت وادب سے لگاؤ رکھنے والی قومیں ہی آگے بڑھتی ہیں۔انہوں نے مزید کہا کہ صورت حال بہتر ہونے پر ثقافتی وادبی سرگرمیوں کو زیادہ فروغ دیں گے۔

یاد رہے کہ دو روز قبل وزیراعلیٰ پنجاب کا کہنا تھا کہ لاک ڈاؤن کے باعث دیگر طبقوں کی طرح فنکاروں کو بھی مالی مشکلات کا سامنا ہے اور تحریک انصاف کی حکومت کو فنکاروں کی مشکلات کا احساس ہے لہٰذا مالی امداد کوئی احسان نہیں بلکہ فنکاروں کا حق ہے۔

Comments

یہ بھی پڑھیں