لاہور : وزیراعلیٰ پنجاب عثمان بزدار نے دیہات میں سیوریج اورصفائی بہتر بنانے کےلیےبڑا فیصلہ کرتے ہوئے پنجاب رورل سسٹین ایبل میونسپل سروس کے لیے الگ ادارہ بنانے کی منظوری دے دی۔
تفصیلات کے مطابق وزیراعلیٰ پنجاب عثمان بزدار کی زیرصدارت اعلیٰ سطح کا اجلاس ہوا ، جس میں پنجاب انٹرمیڈیٹ سٹیز امپرومنٹ انویسٹمنٹ پروگرام پرپیش رفت کا جائزہ لیا گیا۔
اجلاس میں وزیراعلیٰ پنجاب نے پنجاب رورل سسٹین ایبل میونسپل سروس کےلیےالگ ادارہ بنانے کی منظوری دے دی، ادارہ گاؤں میں سیوریج او رصفائی کیلئے خدمات سرانجام دے گا جبکہ ادارے کا خودمختار بورڈ آف ڈائریکٹرز تشکیل دیا جائے گا۔
وزیراعلیٰ پنجاب کی ہدایت پر50دیہات کوماڈل ویلج بنانے کے پروگرام پر کام شروع کردیا گیا ہے ، اس حوالے سے عثمان بزدار نے کہا کہ علیحدہ ادارے سےدیہات میں سیوریج اور صفائی میں بہتری آئے گی، فراہمی و نکاسی آب کےساتھ فلاح کے دیگر منصوبے مکمل ہوں گے۔
وزیراعلیٰ پنجاب کا کہنا تھا کہ پنجاب انٹرمیڈیٹ سٹیزامپرومنٹ انویسٹمنٹ پروگرام جاری ہے، ساہیوال اورسیالکوٹ میں 43ارب کےمنصوبوں پر کام جاری ہے، نکاسی آب کی نئی پائپ لائن بچھائی جا رہی ہے۔
انھوں نے بتایا کہ ساہیوال اور سیالکوٹ میں پارکس بحالی کے منصوبےمکمل ہوچکے ہیں جبکہ دیگرشہروں میں بھی فلاح عامہ کے منصوبوں پر کام کیا جا رہا ہے۔
اجلاس میں عثمان بزدار نے سالڈ ویسٹ مینجمنٹ کےلیےضروری مشینری جلد فراہم کرنے کی ہدایت بھی کی۔
