لاہور: نگراں وزیرِ اعلیٰ پنجاب حسن عسکری نے یومِ آزادی کے موقع پر وَن ویلنگ اور ہوائی فائرنگ پر پابندی لگاتے ہوئے پولیس کو ہدایت جاری کی ہے کہ قانون توڑنے والوں کے خلاف فوری کارروائی کی جائے۔
تفصیلات کے مطابق پنجاب کے نگراں وزیرِ اعلیٰ نے 14 اگست پر تفریحی مقامات کے اطراف ٹریفک رواں رکھنے کے خصوصی انتظامات کی ہدایت جارتی کرتے ہوئے کہا ہے کہ شہریوں کو وَن ویلنگ اور ہوائی فائرنگ سے روکا جائے۔
حسن عسکری کا کہنا تھا کہ زندہ قومیں یومِ آزادی بھرپور طریقے سے مناتی ہیں، قوم 14 اگست کو یومِ آزادی جوش و خروش سے منائے گی۔
نگراں وزیرِ اعلیٰ پنجاب نے پولیس، انتظامیہ اور تمام متعلقہ اداروں کو پوری طرح الرٹ رہنے کی ہدایات جاری کر دیں، انھوں نے کہا کہ عوام کے جان و مال کے تحفظ کے لیے انتظامات یقینی بنائے جائیں۔
قائد اعظم کے نامزد کردہ وزیراعلیٰ پنجاب سے آج تک، کون اس عہدے پررہا
حسن عسکری نے مزید کہا کہ یومِ آزادی پر قومی ہیروز کو بھرپور انداز میں خراجِ عقیدت پیش کیا جائے گا، اس موقع پر منعقد ہونے والی تقریبات کی سیکورٹی پر خصوصی توجہ دی جائے۔
