نگراں وزیر اعلیٰ پنجاب محسن نقوی پاکستان کرکٹ بورڈ (پی سی بی) کے بلا مقابلہ نئے چیئرمین منتخب ہو گئے ہیں۔
اے آر وائی نیوز کے مطابق نگراں وزیر اعلیٰ پنجاب محسن نقوی بلامقابلہ پاکستان کرکٹ بورڈ کے نئے چیئرمین منتخب ہو گئے ہیں۔ پی سی بی چیئرمین کے انتخاب کے لیے گورننگ بورڈ کا اجلاس نیشنل کرکٹ اکیڈمی میں ہوا۔
چیئرمین کیلیے محسن نقوی اور مصطفیٰ رمدے امیدوار تھے تاہم آخری وقت میں وہ مقابلے سے دستبردار ہو گئے۔
محسن نقوی کو تین سال کیلیے کرکٹ بورڈ کی سربراہی سونپی گئی ہے۔ وہ پی سی بی کے 37 ویں چیئرمین اور یہ عہدہ پانے والے 33 ویں شخص ہیں۔
اس سے قبل نجم سیٹھی تین بار، ذکا اشرف اور شہریار خان دو دو مرتبہ چیئرمین کے عہدے پر ذمے داریاں انجام دے چکے ہیں۔
دسمبر 2022 میں سابق چیئرمین پی سی بی رمیز راجا کو برطرف کیا گیا تھا جس کے بعد نئے چیئرمین کو آنے میں 14 ماہ کا وقت لگا۔
رمیز راجا کے بعد پی سی بی منیجمنٹ کمیٹی قائم کی گئی تھی جس کا سربراہ نجم سیٹھی کو مقرر کیا گیا تھا تاہم چھ ماہ بعد ہی نجم سیٹھی کو ہٹا کر ذکا اشرف کو یہ چارج دے دیا گیا تھا۔
گزشتہ ماہ ذکا اشرف نے بھی اپنے عہدے سے استعفیٰ دے دیا تھا جس کے بعد شاہ خاور کو قائم مقام چیئرمین بنایا گیا اور ان کی سربراہی میں بورڈ کے الیکشن کرائے گئے۔
