لاہور : وزیراعلیٰ پنجاب عثمان بزدار نے سانحہ سیالکوٹ کے حوالے سے دو ٹوک مؤقف میں کہا درندگی کا مظاہرہ کرنے والے کسی رعایت کے مستحق نہیں، ملزمان عبرتناک سزاسے نہیں بچ پائیں گے۔
تفصیلات کے مطابق وزیراعلیٰ پنجاب عثمان بزدار نے اپنے بیان میں کہا سیالکوٹ کے دردناک واقعہ پر ہر پاکستانی افسردہ ہے ، ذمہ دارعناصرانسان کہلانے کے حقدار نہیں ، ملزمان عبرتناک سزا سے نہیں بچ پائیں گے۔
عثمان بزدار کا کہنا تھا کہ انصاف ہرصورت ہوگا اور ہوتا ہوا نظربھی آئے گا، درندگی کا مظاہرہ کرنے والے کسی رعایت کےمستحق نہیں، ملزمان کوقانون کے مطابق سخت ترین سزا دلائی جائے گی۔
وزیراعلیٰ پنجاب نے مزید کہا کہ دین اسلام میں تشدد کی کوئی گنجائش نہیں۔
گذشتہ روز وزیر قانون پنجاب راجہ بشارت کا کہنا تھا کہ سیالکوٹ واقعے کی جتنی مذمت کی جائے کم ہے، واقعہ صبح 11 بجکر 26 منٹ پرپیش آیا، پولیس موقع پر پہنچی، پولیس نے مشتعل ہجوم کوکنٹرول کرنے کی کوشش کی۔
راجہ بشارت نے بتایا واقعے میں ملوث 100 سے زائد افراد کو اب تک گرفتار کرچکے اور سی سی ٹی وی فوٹیج کی مدد سے لوگوں کی شناخت کی جارہی ہے، وزیراعلیٰ عثمان بزدار بھی تحقیقات کی خود مانیٹرنگ کررہے ہیں۔
وزیر قانون کا کہنا تھا کہ واقعہ کتنے لوگوں نے شروع کیا اس کی تحقیقات کی جارہی ہیں، واقعے کی اصل وجوہات کیا ہیں اس کی تحقیقات ہورہی ہیں، اس قسم کے واقعات کوکسی صورت قبول نہیں کیا جاسکتا، جو لوگ واقعے میں ملوث ہیں انہیں قانون کے مطابق سزا دی جائے گی۔
