لاہور : وزیراعلیٰ پنجاب چوہدری پرویز الٰہی کا کہنا ہے کہ پروپیگنڈا کرنے والے جان لیں ہم ایک ہیں اور رہیں گے ، کوئی کسی خوش فہمی میں نہ رہے، ہم عمران خان کے ساتھ ہیں۔
تفصیلات کے مطابق پنجاب کی سیاسی صورتحال میں تبدیلی کے حوالے سے وزیراعلیٰ پنجاب پرویز الہٰی بھی متحرک ہیں۔
وزیراعلیٰ پنجاب چوہدری پرویز الٰہی کی زیر صدارت اعلی سطح کا مشاورتی اجلاس ہوا ، جس میں باہمی دلچسپی کے امور اور سیاسی صورتحال پر تبادلہ خیال کیا گیا اور پنجاب اسمبلی میں نمبر گیم کے حوالے سے بھی بات چیت ہوئی۔
اجلاس میں اپوزیشن کے ہر غیر آئینی ہتھکنڈے کا بھرپور مقابلہ کرنے کے عزم کا اعادہ کیا گیا۔
اس موقع پر وزیراعلیٰ پنجاب پرویزالٰہی نے کہا کہ پنجاب میں اپوزیشن اقتدار کے خواب دیکھ رہی ہے، خوابوں میں گم اپوزیشن کے پاس نمبرز ہی پورے نہیں۔
پرویز الٰہی کا کہنا تھا کہ پنجاب میں ن لیگ کو پہلے بھی مار پڑی آئندہ بھی چھپنے کی جگہ نہیں ملے گی، پروپیگنڈا کرنے والی فیکٹری ن لیگ کے گھر لگی ہوئی ہے، پروپیگنڈا کرنے والے جان لیں ہم ایک ہیں اور رہیں گے۔
انھوں نے کہا کہ کوئی کسی خوش فہمی میں نہ رہے، ہم عمران خان کے ساتھ ہیں، غلط فہمیاں پیدا کرنے والے پہلے کی طرح ناکام رہیں گے، ن لیگ کے دعوے صرف ہوائی ہیں۔
وزیراعلیٰ پنجاب نے حکومت پر تنقید کرتے ہوئے کہا کہ وفاقی حکومت کی بدترین کارکردگی پر پورا ملک سراپا احتجاج ہے، وفاقی حکومت کی نااہلی ،نالائقی کی سزا 22 کروڑ عوام بھگت رہے ہیں۔
