لاہور : وزیر اعلیٰ پنجاب سردار عثمان بزدار نے کہا ہے کہ نریندر مودی نے اپنے لئے تباہی اور بربادی کا گڑھا خود کھودا ہے، بھارتی سرکار کو نہتے کشمیری عوام پر ظلم و ستم کا حساب دینا ہوگا۔
ان خیالات کا اظہار انہوں نے ہندوستان کے یوم آزادی کے موقع پر اپنے بیان میں کیا، انہوں نے کہا کہ بھارت کے یوم آزادی کے موقع پر کشمیری عوام سراپا احتجاج ہیں اور اس دن کو یوم سیاہ کے طور پر منا رہے ہیں۔
عثمان بزدار نے کہا کہ پاکستان کا بچہ بچہ مظلوم کشمیریوں کے ساتھ ہے، پاکستان اور کشمیر پلے دن سے نہ ٹوٹنے والے بندھن میں بندھے ہیں، کشمیریوں کی اخلاقی و سیاسی حمایت جاری رکھیں گے۔
وزیر اعلیٰ پنجاب کا کہنا تھا کہ جمہوریت کے دعویدار بھارت نے جمہوری اقدار کا خون کیا، کشمیری عوام کے ساتھ کھڑے ہیں اور کھڑے رہیں گے، مودی سرکار نے کشمیریوں کے حقوق سلب کرکے آزادی کا حق چھینا۔
عثمان بزدار کا مزید کہنا تھا کہ مودی سرکار نے اپنے لئے تباہی اور بربادی کا گڑھا خود کھودا ہے، بھارتی حکمرانوں کو نہتے کشمیری عوام پر ظلم و ستم کا حساب دینا ہوگا۔
واضح رہے کہ گزشتہ روز مقبوضہ وادی میں پاکستان کے یوم آزادی کا جشن منایا گیا تھا، اس موقع پر سرینگر میں پاکستانی پرچم لہرائے گئے تھے، آج بھارت کے یوم آزادی پر دنیا بھر میں مقیم کشمیری یوم سیاہ منائیں گے۔
یوم سیاہ پر بھارتی غیر قانونی مقبوضہ جموں و کشمیر میں مکمل ہڑتال ہوگی، قابض انتظامیہ نے مظاہرے روکنے کے لیے مقبوضہ علاقے میں پابندیوں کو مزید سخت کر دیا ہے۔
ادھر کشمیر کونسل یورپ نے بیان جاری کرتے ہوئے کہا ہے کہ ہم بھارت کا یوم آزادی یوم سیاہ کے طور پر منائیں گے، یورپی ہیڈکوارٹرز میں بھارتی سفارت خانے کے سامنے مظاہرہ بھی کیا جائے گا۔
