کراچی: وزیر اعلیٰ سندھ سید مراد علی شاہ نے کہا ہے کہ وزیراعظم عمران خان سے گزارش ہے کہ کراچی کے پروجیکٹ پر بات کریں۔
تفصیلات کے مطابق وزیراعلیٰ سندھ سید مراد علی شاہ میڈیا سے گفتگو کرتے ہوئے کہا کہ مراد علی شاہ پسند نہیں کوئی بات نہیں لیکن سندھ کو نہ بھولیں، سندھ کے ساتھ ایسا سلوک نہ کیا جائے، ہمارے سارے منصوبے روک دئیے گئے ہیں۔
انہوں نے کہا کہ وزیر ریلوے نے کراچی سرکلر ریلوے کا کوئی ذکر نہیں کیا ہے، دسمبر 2016 میں اس وقت کے وزیراعظم کو خط لکھا تھا، درخواست کی کراچی سرکلر ریلوے کو سی پیک میں لیا جائے، وہی اہمیت دی جائے جو لاہور اورنج کی ہے۔
مزید پڑھیں: پانی کا بحران : مراد علی شاہ کی زیر صدارت تمام سیاسی و غیر سیاسی اسٹیک ہولڈرز کا اجلاس
مراد علی شاہ نے کہا کہ اس وقت کے وزیراعظم نے خط کا جواب دیا اور مثبت جواب دیا تھا، اکتوبر 2017 میں ماس ٹرانزٹ سسٹم منظور ہوگیا تھا، موجودہ حکومت کو تین خط لکھ چکا ہوں، مجھے کسی خط کا جواب نہیں دیا گیا۔
وزیراعلیٰ سندھ نے کہا کہ اسمبلی سے قرارداد پاس کرائیں وزیراعظم سے درخواست ہے، ایم ایل ون کے لیے بات کرنے جارہے ہیں یہ بتایا گیا ہے، ایم ایل ون کے سی آر کا روٹ ہے اس کو استعمال کرنا چاہتے ہیں۔
انہوں نے کہا کہ کے سی آر کے لیے حل دیکھیں ہم اس ٹریک کو بنانا چاہتے ہیں، کے سی آر ٹریک کو نہ چھیڑیں، ایم ایل ون بھی اہم ہے۔
