کراچی: وزیراعلیٰ سندھ سید مراد علی شاہ کی زیرصدارت کراچی کی صفائی پر اہم اجلاس ہوا جس میں صفائی ستھرائی کے کام کو مستقل بنانے پر زور دیا گیا۔
تفصیلات کے مطابق دوران اجلاس وزیراعلیٰ سندھ نے ہدایت کی کہ کراچی میں ڈی ایم سیز کی گاڑیوں کی مرمت کا کام جلد کیا جائے۔ گھروں اور گلیوں سے کچرا اٹھاکر جی ٹی ایس تک پہنچانا ترجیح ہے۔
وزیراعلیٰ سندھ کا کہنا تھا کہ ڈی ایم سیز کو ٹریکٹر ودیگر مشینری کے لیے فنڈز آج جاری کردیئے، ڈی ایم سیز صفائی شروع کردیں۔
انہوں انتظامیہ پر برہمی کا اظہار کرتے ہوئے کہا کہ 22اکتوبر کو شرقی اور جنوبی میں ہڑتال کیوں ہوئی؟ ایسے کنٹریکٹر نہیں چاہئیں جو بلیک میلنگ کریں۔
مراد علی شاہ نے ایس ایس ڈبلیو ایم اے کو سخت کارروائی کی ہدایت کی۔ ان کا کہنا تھا کہ ہم مفت میں کام نہیں کرا رہے ہیں کہ آنکھ بند کردیں، صفائی کرنے والی کمپنی کام نہیں کرے تو معاہدہ ختم کریں۔
ہماری کچرا مہم سے کراچی میں کافی حد تک فرق آیا، وزیراعلیٰ سندھ
یاد رہے کہ 16 اکتوبر کو اپنے ایک بیان میں وزیراعلیٰ سید مراد علی شاہ کا کہنا تھا کہ ہماری کچرا مہم سے کراچی میں کافی حد تک فرق نظر آرہا ہے، 70 فیصد کچرا ان ڈسٹرکٹ سے اٹھایا جہاں سے کچرا نہیں اٹھ رہا تھا۔
