کراچی: وزیراعلیٰ سندھ سید مراد علی شاہ نے کہا ہے کہ اردو ہم سب کے لیے محبت اور آپس میں جوڑنے والا رشتہ ہے، کراچی اردو بولنے والوں کا سب سے بڑا شہر ہے۔
تفصیلات کے مطابق وزیراعلیٰ سندھ سید مراد علی شاہ نے عالمی اردو کانفرنس سے خطاب کرتے ہوئے کہا ہے کہ اردو کانفرنس میں شرکت میرے لیے اعزاز ہے، اردو ادب نے ہمیشہ ہم آہنگی کی فضا قائم کرنے میں کردار ادا کیا ہے۔
وزیراعلیٰ سندھ نے کہا کہ لسانی سیاست کرنے والوں نے کراچی کو تباہی کے سوا کچھ نہیں دیا، کراچی والوں نے منفی قوتوں کو مسترد کردیا ہے، شہری کراچی میں امن کی بحالی کے لیے ساتھ دے رہے ہیں۔
مراد علی شاہ نے کہا کہ کراچی پاکستان اور سندھ کا سب سے بڑا اہم شہر ہے، یہاں رہنے والے تمام طبقے ہم آہنگی سے رہتے ہیں، ہمارا بڑا ہدف یہ ہے کہ ترقی کی رفتار کو تیز کیا جائے۔
وزیراعلیٰ سندھ نے کہا کہ آرٹس کونسل نے امن و ثقافتی سرگرمیوں کی بحالی میں کردار ادا کیا، انہوں نے اردو کی نامور شاعرہ اور ادیبہ فہمیدہ ریاض کے انتقال پر گہرے دکھ و افسوس کا اظہار کیا۔
واضح رہے کہ آرٹس کونسل کراچی میں عالمی اردو کانفرنس کا آغاز ہوگیا ہے، چار روزہ عالمی اردو کانفرنس میں دنیا بھر سے ادبی شخصیات شریک ہیں۔
افتتاحی اجلاس میں مجلس صدارت کے اراکین میں بھارت سے آئی ہوئی نورظہیر، جرمنی سے آئے ہوئے عارف نقوی سمیت مستنصر حسین تارڑ، اسد محمد خاں، افتخار عارف، رضا علی عابدی، پیرزادہ قاسم، مسعود اشعر، امینہ سید ودیگر شامل تھے۔
