کراچی: وزیراعلیٰ سندھ نے شہر قائد میں کار شوروم مالکان کو دو ہفتوں میں شہر بھر کے فٹ پاتھوں سے گاڑیاں ہٹانے کا حکم دے دیا۔
اے آر وائی نیوز کے نمائندے ارباب چانڈیوکے مطابق وزیراعلیٰ سندھ مراد علی شاہ کی زیر صدارت وزیراعلیٰ ہاؤس میں اپیکس کمیٹی کے اجلاس کے بعد کراچی پیکیج پر اجلاس ہوا جس میں وزیراعلیٰ سندھ نے برہمی کا اظہار کیا کہ شہر میں کار شوروم مالکان اپنی گاڑیاں فٹ پاتھ پر کھڑی کردیتے ہیں، عوام کو فٹ پاتھ پر چلنا نصیب نہیں ہوتا۔
وزیراعلیٰ نے شو روم مالکان کو حکم دیا ہے کہ دو ہفتے میں اپنی گاڑیاں فٹ پاتھ سے ہٹالیں کیوں کہ یہ فٹ پاتھ عوام کے لیے ہیں، بصورت دیگر مالکان کے خلاف سخت کارروائی کی جائے گی۔
انہوں نے کمشنر کراچی اور ڈی آئی جی ٹریفک کو الٹی میٹم دیا کہ وہ دو ہفتوں کے اندر ہر صوررت حکم پر عمل درآمد کرائیں۔
نیوز اینکر پرسن کے سوال پر نمائندے نے بتایا کہ یہ کراچی کا بہت پرانا مسئلہ ہے اگر دو ہفتوں میں یہ گاڑیاں ہٹ بھی گئیں تو یہی انتظامیہ رشوت لے کر دوبارہ سے گاڑیاں پارک کرنے کی اجازت دے گی کیوں کہ یہاں پورا مافیا کام کررہا ہے جو بھتہ کی رقم وصول کرتا ہے، صدر ایمپریس مارکیٹ اس کی واضح مثال ہے جہاں انکروچمنٹ کے خلاف بارہا آپریشن کے باوجود آج بھی پتھارے موجود ہیں۔
انہوں نے ایک اور سوال پر بتایا کہ پولیس کی سرپرستی کے بغیر گاڑیاں پارک نہیں ہوتیں یعنی متعلقہ تھانوں کی سرپرستی کے ساتھ یہ کام ہوتا ہے۔
0
20