جامشورو: وزیراعلیٰ سندھ سید قائم علی شاہ نے کہا ہے کہ جمہوریت کیلئے ہمارا سر حاضر ہے، اس کو ڈی ریل نہیں ہونے دیں گے۔ ڈرون حملے پاکستان کی سالمیت کیخلاف ہیں۔
ان خیالات کا اظہارانہوں نے حضرت لعل شہباز قلندر کے عرس مبارک کی تقریبات کے تیسرے روز اختتامی تقریب کے موقع پرمیڈیا سے گفتگو کرتے ہوئے کیا۔
اس موقع پر وزیراعلیٰ سندھ نے حضرت لعل شہباز قلندر کے مزار شریف پہ چادر چڑھا کر دعا بھی کی، انہوں نے کہا کہ نواز شریف اور آصف علی زرداری کے درمیان انشاء اللہ ملاقات ہو گی۔
انہوں نے کہا کہ جمہوریت کے لئے ہماری جانیں قربان ہیں جمہوریت کے لئے ہماری اعلیٰ قیادت سمیت کارکنان نے قربانیاں دی ہیں، اس کو ڈی ریل نہیں ہونے دیں گے۔
ان کا کہنا تھا کہ جمہوریت ہی عوام کے راج کا نام ہے، یہ عوام کی حکمرانی ہے عوام بھی چاہتی ہے کہ جمہوری حکومت قائم رہے، کسی ڈکٹیٹر کی حکومت ہمیں نہیں چاہئے، عوام کے مسائل خود عوام سے ساتھ مل کر حل کریں گے۔
انہوں نے ایک سوال کے جواب میں کہا کہ مسلم لیگ اور پی پی رہنماؤں کے درمیان ملاقات پر جو پارٹی فیصلہ کرے گی وہی ہمارا فیصلہ ہو گا۔
انہوں نے کہا کہ سندھ کے احتساب کمیشن پر کام جاری ہے افسران اور کمیٹی اپنا کام کر رہی ہے۔ انہوں نے صحافیوں سے بات چیت کرتے ہوئے کہا کہ حضرت لعل شہباز قلندر کی درگاہ کی تزئین و آرائش کے لئے کسی قسم کا حساب کتاب نہیں کیا جائے گا، جنتی رقم لگی لگائے جائے گئی اور درگاہ سمیت شہر بھر کو خوب صورت بنایا جائے گا۔
انہوں نے کہا کہ یہاں آنے والے تمام زائرین کو تمام سہولیات فراہم کی گئیں ہیں، جس کے سبب آنے والے زائرین کو عرس کے دوران کسی قسم کی تکلیف نہیں ہوئی۔
