کراچی: وزیرِ اعلیٰ سندھ نے شہر میں بد ترین ٹریفک جا م کا نوٹس لے لیا، آئی جی ٹریفک سے رابطہ کر کے ٹریفک کی روانی کو یقینی بنانے کی ہدایت کر دی۔
تفصیلات کے مطابق وزیرِ اعلیٰ سندھ مراد علی شاہ نے شہر میں شدید ٹریفک جام کا نوٹس لیتے ہوئے آئی جی ٹریفک سے رابطہ کر کے کہا کہ شہر میں ٹریفک کی روانی کو یقینی بنایا جائے۔
قبل ازیں کراچی کے مختلف علاقوں میں آج شدید ٹریفک جام رہا، شہریوں کو شدید پریشانی کا سامنا کرنا پڑا، ٹریفک پولیس کے مطابق گرو مندر سے لسبیلہ جانے والی سڑک ٹریفک کے لیے بند کی گئی۔
رضویہ سوسائٹی سے ناظم آباد ایک نمبر تک بھی سڑک بند کی گئی، راستے بند ہونے سے صدر، سولجر بازار اور اطراف میں بد ترین ٹریفک جام ہوا۔
یہ بھی پڑھیں: چپ تعزیے کا مرکزی جلوس نشتر پارک سے برآمد
گرو مندر، جہانگیر روڈ، لیاقت آباد، ناظم آباد، عائشہ منزل میں بھی گاڑیوں کی قطاریں لگ گئیں، گارڈن، سائٹ ایریا،غریب آباد، حسن اسکوائر، لسبیلہ، پٹیل پاڑہ، گولیمار چورنگی میں بھی ٹریفک جام رہا۔
خیال رہے کہ آج شہر میں چُپ تعزیے کا جلوس نکلنا تھا، مرکزی جلوس نشتر پارک سے برآمد ہوا جو ایم اے جناح روڈ سے صدر، ایمپریس مارکیٹ اور پھر دوبارہ ایم اے جناح روڈ پر اپنے روایتی راستوں سے ہوتا ہوا حسینیہ ایرانیاں کھارادر پہنچ کر اختتام پذیر ہوا۔
