لاہور: وزیراعلیٰ پنجاب سردار عثمان بزدار نے کہا کہ حضوراکرمﷺکی تعلیمات پرعمل سے بدامنی کا خاتمہ ہوسکتا ہے۔
تفصیلات کے مطابق وزیراعلیٰ پنجاب سردار عثمان بزدار نے عید میلادالنبی ﷺ کے موقع پر امت مسلمہ کو مبارکباد دیتے ہوئے کہا کہ حضوراکرمﷺ کے اسوہ حسنہ پر عمل سے پاکستان کوامن کا گہوارہ بنایا جاسکتا ہے۔
وزیراعلیٰ پنجاب نے کہا کہ حضوراکرمﷺکی تعلیمات پرعمل سے بدامنی کا خاتمہ ہوسکتا ہے، دہشت گردی کی آگ میں جلتی انسانیت کوآپؐ کی تعلیمات پرعمل سے امن مل سکتا ہے۔
ملک بھرمیں جشن میلاد النبیﷺ مذہبی جوش وجذبے سے منایا جا رہا ہے
واضح رہے کہ محسن انسانیت محبوب خدا آقائے دوجہاں حضرت محمد مصطفیٰﷺکی ولادت باسعادت کی مناسبت سے جشن میلاد النبیﷺآج عقیدت واحترام کے ساتھ منایا جارہا ہے۔
جشن میلاد النبیﷺ کے موقع پر تمام سرکاری وغیرسرکاری عمارتوں پرچراغاں کیا گیا ہے جبکہ گھروں، مساجد، دفاتر، مارکیٹوں، بازاروں اور شاہراوں کو برقی قمقموں سے سجایا گیا ہے۔
عید میلاد النبیﷺ کے موقع پر جلوسوں اور محفلوں کی حفاظت کے لیے وفاقی اورصوبائی حکومتوں کی جانب سے سخت سیکورٹی انتظامات کیے گئے ہیں۔
