لاہور: وزیراعلیٰ پنجاب سردار عثمان بزدار کا کہنا ہے کہ پاکستانی قوم کھیلوں خصوصاً کرکٹ سے محبت کرنے والی قوم ہے، سری لنکن ٹیم کی آمد کرکٹ کے میدان میں ہوا کا تازہ جھونکا ہے۔
تفصیلات کے مطابق وزیراعلیٰ پنجاب سردار عثمان بزدار کا کہنا ہے کہ سری لنکن ٹیم کی آمد سے انٹرنیشنل ٹیسٹ کرکٹ کی بحالی خوش آئند ہے، سری لنکن ٹیم کے کھلاڑیوں، مینجمنٹ کا شکریہ ادا کرتے ہیں۔
وزیراعلیٰ پنجاب نے کہا کہ پاکستانی قوم کھیلوں خصوصاً کرکٹ سے محبت کرنے والی قوم ہے، سری لنکن ٹیم کی آمد کرکٹ کے میدان میں ہوا کا تازہ جھونکا ہے، شائقین کرکٹ ٹیسٹ میچوں سے محظوظ ہوں گے۔
سردار عثمان بزدار نے کہا کہ کرکٹ کے میدان آباد ہونے سے دنیا کو مثبت پیغام جائے گا، امید ہے سری لنکن ٹیم کے بعد دیگر ٹیمیں بھی پاکستان آئیں گی۔
سری لنکن کرکٹ ٹیم پاکستان پہنچ گئی
یاد رہے کہ گزشتہ روز سری لنکا کی کرکٹ ٹیم ٹیسٹ سیریز کھیلنے کے لیے اسلام آباد پہنچی تھی۔ پاکستان میں 10 سال بعد کھیلی جانے والی ٹیسٹ سیریز کا آغاز 11 دسمبر سے ہوگا جہاں سری لنکن ٹیم اپنے ورلڈ چیمپئن شپ میچز کھلیے گی۔
پاکستان اور سری لنکا کے درمیان پہلا ٹیسٹ میچ کل راولپنڈی میں کھیلا جائے گا جبکہ دوسرا ٹیسٹ میچ 19 سے 23 دسمبر تک کراچی کے نیشنل اسٹیڈیم میں ہوگا۔
