کراچی: وزیراعلیٰ سندھ مراد علی شاہ کا اقلیتوں کےقومی دن پر تقریب سے خطاب کرتے ہوئے کہنا تھا کہ اس ملک کی ترقی میں اقلیتوں کا اہم کردار ہے.

تفصیلات کےمطابق وزیراعلیٰ سندھ مراد علی شاہ نے آج صبح وزیراعلیٰ ہاؤس میں پودا لگا کر سندھ میں شجرکاری مہم کا آغاز کیا،اس موقع پر صوبائی وزراء بھی موجود تھے.

وزیراعلی ہاؤس میں پودا لگا کر شجرکاری کی مہم کا آغاز کرنے کے بعد وزیراعلیٰ سندھ مراد علی شاہ صدر میں واقع چرچ میں پہنچے جہاں بچوں نے ڈرم بجا کر اُن کا استقبال کیا.

وزیراعلیٰ سندھ مراد علی شاہ نے چرچ میں پرچم کشائی کی اور اپنی54ویں سالگرہ کا کیک کاٹا،اس موقع پر تقریب سے خطاب کرتے ہوئے انہوں نے کہا کہ یہاں چیئرمین پیپلزپارٹی بلاول بھٹو نے بھی آنا تھا مگر مصروفیات کے باعث شرکت نہیں کرسکے.

انہوں نے تقریب کے دوران ملک کی ترقی میں مسیحی برادری سمیت تمام اقلیتوں کے کردار کو سراہا،اس موقع پر وزیراعلیٰ سندھ کا کہنا تھا کہ میں نے بھی سینٹ پیٹرز برگ سے تعلیم حاصل کی،آج اساتذہ یاد آرہے ہیں.

وزیراعلیٰ سندھ کا کہنا تھا کہ پیپلز پارٹی اقلیتوں کے لیے کام کرتی آئی ہے،سندھ حکومت نے ہندو میرج ایکٹ منظور کرایا،ان کا مزید کہنا تھا کہ ہر کمیونٹی کو درپیش مسائل کے حل کی کوشش کروں گا.

چرچ کے باہر میڈیا سے گفتگو کرتےہوئے وزیراعلیٰ سندھ مراد علی شاہ کا کہنا تھا کہ وفاق اور صوبے میں کوئی تصادم نہیں،ہم سب مل کر دہشت گردی سے لڑ رہے ہیں.

ّواضح رہے کہ وزیر اعلی سندھ کی ایم اے جناح روڈ پرمندر میں اقلیتوں کے تحفظ کے حوالے سے ہونے والی تقریب میں بھی شرکت کی اور گردوارے کا بھی دورہ کیا.