کراچی : سی این جی کی قیمت سو کا ہندسہ عبور کرگئی، ایک سو چار روپے فی کلو فروخت کی جائے گی، اسٹیشن مالکان نے سی این جی فی کلو کے بجائے فی لیٹر سے فروخت کرنے کا بھی اعلان کیا ہے۔
تفصیلات کے مطابق حکومت کی جانب سے گیس کی قیمتوں میں اضافے کے اعلان کے بعد گاڑی مالکان، ٹرانسپورٹر، مسافروں سمیت طلباء وطالبات سب ہی پریشان ہوگئے ہیں۔
کراچی ٹرانسپورٹ اونرز نے دس روز بعد مزید دس روپے کرایہ بڑھانے کا اعلان کردیا۔ان کا کہنا ہے کہ حکومت سی این جی قیمتوں میں اضافہ فوری واپس لے، بصورت دیگر کرایوں میں اضافہ ناگزیر ہوجائے گا۔
علاوہ ازیں سی این جی اسٹیشن اونرز ایسوسی ایشن کی جانب سے اعلان کیا گیا ہے کہ آج سے گیس کی فروخت فی کلو کے بجائے79روپے فی لیٹر کے حساب سے کی جائے گی۔
اس حوالے سے ایسوسی ایشن کے چیئرمین ملک خدا بخش کا کہنا ہے کہ اوگرا سے سی این جی کی کلو کے بجائے لیٹر میں فروخت کے لیے رابطہ کررہے ہیں کیونکہ سی این جی سیکٹرکی بقاء بھی لیٹر میں فروخت سے ممکن ہے۔
