کراچی: شہر قائد سمیت صوبے میں 6 دن بند رہنے کے بعد سی این جی اسٹیشنز اتوار کو 24 گھنٹے کے لیے کھول دیے جائیں گے۔
اے آر وائی نیوز کے مطابق سندھ بھر میں گیس کا شدید بحران جاری ہے، کراچی سمیت صوبے میں چھے دن سی این جی اسٹیشنز بند رہے، کل اتوار کو چوبیس گھنٹے کے لیے سی این جی اسٹیشنز کھولے جا رہے ہیں۔
سندھ بھر میں کل صبح 8 بجے سے سی این جی اسٹیشنز 24 گھنٹے کے لیے کھلے رہیں گے، اتوار کو کھلے رہنے کے بعد سی این جی اسٹیشنز پیر کی صبح 8 بجے سے جمعرات صبح 8 بجے تک دوبارہ بند کر دیے جائیں گے۔
پنجاب اور اسلام آباد میں بھی سی این جی اسٹیشنز کل صبح 6 بجے کھل جائیں گے، پنجاب اور پوٹھوہار کے سی این جی اسٹیشنز کو 37 دن سےگیس کی فراہمی معطل تھی۔
لاہور کے سی این جی اسٹیشنز کو کل صبح 6 سے شام 6 بجے تک گیس سپلائی جاری رہے گی۔
واضح رہے کہ سی این جی کی عدم فراہمی سندھ میں ہفتے کو بھی برقرار رہی جب کہ سی این جی ڈیلرز ایسوسی ایشن کے مطابق ہفتے کے لیے سی این جی کی فراہمی کا اعلان 15 منٹ بعد سوئی سدرن گیس کی انتظامیہ نے واپس لے لیا۔
کراچی سمیت سندھ بھر میں سی این جی اسٹیشن بند ہیں اور بڑی تعداد میں اس کاروبار سے منسلک افراد کو معاشی مشکلات کا سامنا ہے، اب سندھ بھر میں سی این جی اسٹیشنز 144گھنٹے بعد کھولے جا رہے ہیں۔
