کوئٹہ : کوئلے کی کان میں پھنسے 12 میں سے 4 کان کنوں کی لاشیں نکالی جا چکی ہیں، دیگر کی تلاش میں ریسکیو آپریشن تاحال جاری ہے۔
بلوچستان کے علاقے سنجدی میں کوئلے کی کان میں گیس بھرنے سے دھماکے کے بعد کی جانے والی کارروائی کے دوران اب تک 4 کان کنوں کی لاشیں نکال لی گئیں، مزید 8 مزدوروں کی تلاش کیلیے ریسکیو آپریشن جاری ہے۔
چیف مائنز انسپکٹر کے مطابق نواحی علاقے اسپین کاریز سنجدی کے مقامی کوئلے کی کان میں گزشتہ رات زہریلی گیس بھرنے کے باعث دھماکہ ہوا جس کے بعد پوری کان بیٹھ گئی۔
اطلاعات کے مطابق پی ڈی ایم اے ترجمان کا کہنا ہے کہ ریسکیو ٹیموں نے3600فٹ تک ملبہ نکال کر راستہ صاف کردیا گیا ہے، امید ہے کہ ریسکیو ٹیمیں جلد جلد اندر پھنسے ہوئے مزید کان کنوں تک پہنچ جائیں گی۔
ڈپٹی ڈائریکٹر ریسکیو اصغر جمالی کا کہنا ہے کہ کان کن 4200 فٹ گہرائی میں پھنسے ہوئے ہیں، کان میں بجلی کی ایک ہی لائن تھی جو حادثے میں تباہ ہو گئی، پنکھا چلانے کے لئے بجلی کی دوسری لائن بچھانے اور ملبہ ہٹانے کی وجہ سے امدادی سرگرمیاں تاخیر کا شکار ہوئیں۔
واضح رہے کہ بلوچستان اور کے پی میں اس سے قبل بھی کوئلے کی کانوں میں دھماکوں کے کئی واقعات ہوچکے ہیں اور ان واقعات میں کئی کانکن جاں بحق اور درجنوں زخمی ہوچکے ہیں۔
مزید پڑھیں : کوئلے کی کان سے 12 کان کنوں کی لاشیں نکال لی گئی
یاد رہے کہ اس سے قبل گزشتہ سال مارچ میں بلوچستان کے ضلع ہرنائی میں کوئلے کی کان میں دھماکہ ہوا تھا اور اس میں موجود 18 کان کن پھنس گئے تھے۔ ریسکیو آپریشن کے دوران 8 کان کنوں کو زندہ نکالا گیا تھا۔
